Եվրոպական երկրները Ռուսաստանի սպառնալիքներին ի պատասխան միասնական բանակ չեն ստեղծի, շաբաթ երեկոյան Լեհաստանի պետական հեռուստատեսությամբ հեռարձակված հարցազրույցում ասել է Լեհաստանի արտգործնախարար Ռադոսլավ Սիկորսկին, հաղորդում է Reuters-ը։
Շաբաթ օրն ավելի վաղ Ուկրաինայի նախագահ Վլադիմիր Զելենսկին կոչ էր արել ստեղծել եվրոպական բանակ՝ նշելով, որ աշխարհամասն այլևս չի կարող վստահ լինել ԱՄՆ-ի պաշտպանությանը և Վաշինգտոնի հարգանին կարժանանա միայն ուժեղ բանակի դեպքում։
Եվրոպական բանակի ստեղծման հնարավորության մասին հարցին ի պատասխան՝ Սիկորսկին հեռուստահարցազրույցում ասել է, որ «պետք է զգույշ լինենք այս երույթի հետ, քանի որ մարդիկ տարբեր բաներ են հասկանում»։
«Եթե դրանով հասկանում եք ազգային բանակների միավորում, դա տեղի չի ունենա,- ասել է նա։- Բայց ես եղել եմ Եվրոպայի, Եվրամիության կողմնակից՝ զարգացնելու սեփական պաշտպանական կարողությունները»։
Նա ասել է, որ ԵՄ-ն ներկայում ձևավորում է ուժեղացված բրիգադ։
«Եթե ԱՄՆ-ն ցանկանում է, որ մենք ուժեղացնենք պաշտպանությունը, այն պետք է ունենա ազգային բաղադրիչ, ՆԱՏՕ-ի բաղադրիչ, բայց ես նաև կարծում եմ՝ եվրոպական՝ ԵՄ բաղադրիչ, ԵՄ սուբսիդիաներ պաշտպանական արդյունաբերության համար՝ արտադրական կարողությունները մեծացնելու համար, նաև՝ ԵՄ ուժեր, որոնք արժանի են իրենց անվանը»,- ասել է Սիկորսկին։
Նա նշել է, որ Ուկրաինայում լեհական զորքերի տեղակայումը «քննարկման առարկա չէ, քանի որ ՆԱՏՕ-ի հանդեպ Լեհաստանի պարտականությունն է պաշտպանել արևելյան թևը, այսինքն՝ իր սեփական տարածքը»։
