Շուշան Ստեփանյան, #CivilNetCheck
Սոցցանցերում տարածվում են կեղծ գրառումներ «Հայփոստի» անունից՝ հայտարարությամբ, թե ընկերությունը 799 դրամով վաճառում է հաճախորդների կորցրած փաթեթեները։
«Կորած փաթեթներ – 799 դրամ։ Լոգիստիկ ընկերությունը որոշել է գումար չվատնել 6 ամիս կորցրած ծանրոցների վերամշակման վրա, ուստի հայտարարում է վաճառք»,- նշված է գրառման մեջ։
Սակայն այս գրառումն ընդամենը խայծ է՝ օգտատերերի անձնական և բանկային տվյալները գողանալու համար։
Ի՞նչ են պահանջում զեղծարարները
«Հայփոստի» պաշտոնական ֆեյսբուքյան էջը ՀայՓոստ • HayPost-ն է։ Գրառումը տարածվում է HayPost անվանումով ֆեյսբուքյան կեղծ էջով։ 2023-ին ստեղծված այս էջում ընդամենը երկու գրառում կա կորած ծանրոցների վաճառքի վերաբերյալ, որոնք հրապարակվել են նույն օրը՝ րոպեների տարբերությամբ։
Գրառմանը կցված հղումը տանում է bloopveer4.store անվանումով կայք։ 799 դրամով փաթեթ գնելու համար օգտատերը պետք է ընտրի «ճիշտ նվեր» փաթեթը, ինչի համար ունի երեք հնարավորություն։ Առաջին փորձից երբեք չի ստացվում, բայց երկրորդ փորձից հետո օգտատերը «հաջողում է»։
Այնուհետև զեղծարարները պահանջում են մուտքագրել մեծ քանակությամբ անձնական և բանկային տվյալներ։
Կորած փաթեթների վերաբերյալ կեղծ գրառումները նոր չեն, իսկ լուսանկարը խմբագրված է
Կորած փաթեթների վաճառքի վերաբերյալ լուսանկարը վերցված է համացանցից և խմբագրված է (photoshop):
Նույն լուսանկարներով անգլալեզու մեկ այլ էջ խոհանոցային տեխնիկա է վաճառում։
Ամիսներ առաջ դարձյալ տարածվում էին գրառումներ «Հայփոստի» անունից, թե իբր ընկերությունը կորած փաթեթեները վաճառում է 425 դրամով։ Ընկերությունից #CivilNetCheck-ի հետ զրույցում հերքել էին կորած փաթեթներ վաճառելու վերաբերյալ լուրը։ #CivilNetCheck-ն անդրադարձել է նաև «Զվարթնոց» օդանավակայանի կորած ճամպրուկներ վաճառելու վերաբերյալ նմանատիպ կեղծ լուրին։
