Արաբկիրի ոստիկանների նկատմամբ քրգործ է հարուցվել

ՀՀ Հատուկ քննչական ծառայությունում նոյեմբերի 7-ին ՀՀ քրեական օրենսգրքի 308-րդ հոդվածի 1-ին մասի հատկանիշներով հարուցվել է քրեական գործ՝ ՀՀ ոստիկանության Երևան քաղաքի վարչության Արաբկիրի բաժնի առանձին ծառայողների կողմից պաշտոնական լիազորությունները չարաշահելու դեպքի առթիվ, հաղորդում են Հատուկ քննչական ծառայության մամուլի ծառայությունից:

Պարզվել է, որ ՀՀ ոստիկանության Երևան քաղաքի վարչության Արաբկիրի բաժնի առանձին ծառայողներ, 2011-2012 թթ. ընթացքում, ահազանգեր ստանալով մի քանի քաղաքացիներից՝ կողոպուտի, գողության, ավազակության դեպքերի վերաբերյալ, խմբային շահերից ելնելով, նշված հանցագործության դեպքերը թաքցրել են և միջոցներ չեն ձեռնարկել դրանք բացահայտելու ուղղությամբ՝ էական վնաս պատճառելով քաղաքացիների և պետության օրինական շահերին:

Քրեական գործով կատարվում է նախաքննություն: