Մոսկվան ստիպված կլինի վերանայել Երևանի հետ տնտեսական հարաբերությունների ողջ համալիրը, եթե Հայաստանը անդամակցի Եվրամիությանը, հայտարարել է Ռուսաստանի փոխվարչապետ Ալեքսեյ Օվերչուկը (ՏԱՍՍ)։
«Երևանը ստիպված կլինի ընտրություն կատարել ԵԱՏՄ-ի և ԵՄ-ի միջև՝ կազմակերպության նմանատիպ օրակարգերի պատճառով»,- ասել է Օվերչուկը։
Մարտի 26-ին Հայաստանի խորհրդարանը երկրորդ ընթերցմամբ և ամբողջությամբ ընդունեց «Եվրոպական միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագիծը:
Հայաստանի վարչապետ Նիկոլ Փաշինյանը հայտարարել է, որ այս նախագիծը չի ենթադրում Հայաստանի անդամակցություն ԵՄ-ին։
Ալեքսեյ Օվերչուկն ասել է, որ իրենք ուշադիր հետևում են այս գործընթացին, միևնույն ժամանակ նշել, որ սա Հայաստանի ներքին գործն է։
«Մենք հասկանում ենք, որ եթե Հայաստանը գնա Եվրոպա, ապա, համապատասխանաբար, անհրաժեշտ կլինի վերանայել այս երկրի հետ տնտեսական հարաբերությունների ողջ համալիրը և, ցավոք, դա կարտահայտվի Հայաստանում մարդկանց կենսամակարդակի վրա, ինչը մենք իսկապես չէինք ցանկանա»,- ասել է ՌԴ փոխվարչապետը։
***
Նախորդ տարի ԵՄ-ին անդամակցելու նախաձեռնություն սկսվեց։ Այս նախաձեռնությունը մեկնարկել էր «Ժողովրդավարական ուժերի հարթակը»։ Այն միավորում է արտախորհրդարանական չորս քաղաքական ուժեր՝ «Հանրապետություն», «Հանուն Հանրապետության», Եվրոպական և Քրիստոնեա-ժողովրդավարական կուսակցությունները, ինչպես նաև մի շարք քաղաքացիական նախաձեռնություններ։
Կենտրոնական ընտրական հանձնաժողովը (ԿԸՀ) սեպտեմբերի 11-ին գրանցեց «Ժողովրդավարական ուժերի հարթակ»-ի հայցը։ 60 օրվա ընթացքում` սեպտեմբերի 16-ից մինչև նոյեմբերի 14-ը, նախաձեռնող խումբը պետք է հավաքեր առնվազն 50 հազար ստորագրություն, որպեսզի ԵՄ-ին անդամակցության հանրաքվեի հարցը մտնի ԱԺ օրակարգ։
ԿԸՀ-ն դեկտեմբերի 10-ի նիստում հաստատեց «Եվրոպական միությանը ՀՀ անդամակցելու գործընթացի մեկնարկի մասին» նախաձեռնության ներկայացրած ստորագրությունների վավերականությունը։ Վավեր ստորագրությունները կազմել էր 52 351։
ԵՄ-ին անդամակցության հարցը պետք է որոշվի հանրաքվեով։
