Victoria’s Secret-ը ներողություն է խնդրել «հնդկացիական» ներքնազգեստի համար

Կանանց ներքնազգեստ արտադրող ամերիկյան հանրահայտ Victoria’s Secret ընկերությունը ներողություն է խնդրել բնիկ ամերիկացիներից հնդկացիական ցեղերի հագուստ հիշեցնող ներքնազգեստ ցուցադրելու համար:

Նյու Յորքում Victoria’s Secret-ի նոր հավաքածուի նոյեմբերյան ցուցադրության ժամանակ մոդել Կառլի Քլոսը պոդիում է դուրս եկել փիրուզագույն զարդերով թավշակաշվե ներքնազգեստով և հնդկացիական ցեղերի առաջնորդների փետուրներով գլխարկը հիշեցնող գլխազարդով:

Victoria’s Secret-ի այս մտահղացումը վրդովեցրել է ԱՄՆ-ի բնիկներին, որոնք իրենց բողոքն են հղել ամերիկյան ընկերությանը: Քննադատների կարծիքով՝ «ռասայական անտակտությունն ամենևին սեքսուալ չէ»:

Ի պատասխան՝ Victoria’s Secret-ը հրապարակել է իր պաշտոնական հայտարարությունը. «Ցավում ենք, որ բնիկ ամերիկացիների գլխազարդի ցուցադրումը վրդովեցրել է որոշ մարդկանց»:

Ընկերությունը տեղեկացրել է, որ այս հագուստը կհանվի հավաքածուից: 20-ամյա Կառլի Քլոսը միացել է ընկերությանն ու Twitter-ի իր միկրոբլոգում գրել, որ որևէ մեկին վիրավորելու միտում չուներ: