Եվրասիական միության նախագիծը հետաքրքիր գաղափար է, որ այժմ քայլ առ քայլ իրականանում է. «Կենտրոն» հեռուստատեսության «Ուրվագիծ» հաղորդման տաղավարում նշեց ՌԴ դաշնային խորհրդի անդամ, սենատոր Անդրեյ Կլիմովը, որ Հայաստանում է Եվրասիական միջկուսակցական խորհրդակցություններին որպես «Եդինայա Ռոսիա» կուսակցության անդամ մասնակցելու նպատակով:
Եվրասիական միությունն, ըստ նրա, կարևոր է տարածաշրջանի երկրների համար և ձևավորում է առավել հարմար ինստիտուտներ: «Ես երկար տարիներ աշխատել եմ ԵՄ-ի կառույցներում. այնտեղ խոսքի մակարդակում արժեքները շատերի համար են ընդունվում, իսկ հետո գործերով դա այդքան էլ չի իրականացվում,- ասաց նա,- օրինակ՝ այսօր արդեն իսկ խնդիր է դրված, որ ԵՄ-ի ընդլայնումը պետք է կասեցնել. մարդիկ արդեն իսկ չեն կարողանում տնտեսական խնդիրները հարթել»:
Ըստ նրա՝ Եվրասիական միությունն առավել իրական գործընկերություն է իրար արդեն իսկ ծանոթ հարևանների միջև: «Մենք ասում ենք՝ մենք դատապարտված ենք հարևանության, և պիտի դա դնենք մեր համագործակցության հիմքում»,- ասաց նա՝ հավելելով, որ խոսքը ոչ միայն ազատ տեղաշարժման, ազատ կրթության, միասնական կրթական համակարգի սկզբունքների մասին է, այլև՝ տնտեսական, ձեռնարկատիրական ազատ և հարմար համակարգի մշակման: «Այնպես չի, որ մենք ինչ-որ նոր բան ենք հայտնագործում, մենք վերցնում և կիրառում ենք հենց նույն ԵՄ-ի փորձը՝ այնպես, որ բոլորին օգտակար ու հարմար լինի»,- նշեց նա:
Նոր ԽՍՀՄ ստեղծելու մտավախությանն ի պատասխան՝ նա նշեց. «Այստեղ Ռուսաստանը չի համոզում որևէ երկրի համագործակցել, և ինքն էլ հետաքրքրված չէ մի նոր ԽՍՀՄ ստեղծելում: Ռուսաստանին դա ձեռնտու էլ չէ՝ շատերը մեզ մոտ էլ միանգամից հարցեր են բարձրացնում, թե ինչքանով է նպատակահարմար էլի պարտքեր տալ մի շարք երկրների, հետո նորից ներել դրանք և այդպես շարունակ»:
Այս պահին, ըստ նրա, մի շարք երկրներ դիմում եմ Եվրասիական միությանն անդամակցելու համար, սակայն նրանց հայտերը չեն ընդունվում մի շարք, այդ թվում՝ «ոչ բավարար ժողովրդավարություն ունենալու» պատճառաբանությամբ: «Հայաստանը Եվրասիական միությունում արդեն իսկ մի շարք ինստիտուտների անդամ է՝ իրական, գործող ինստիտուտների»,- հավելեց նա:
Եվրասիական միությունում, ըստ Կլիմովի, որոշումներն ընդունվում են բացառապես հավասարության հիմունքներով, թեպետ «եթե դիտարկենք երկրները՝ տարածքային, ռեսուրսային և բնակչության քանակների տեսանկյունից, պարզ է, որ պիտի լինեին այլ համամասնություններ, սակայն այսօր այն այսպիսին է. և այն բաց է աշխատում, և դա շատ հեշտ կարելի է ստուգել»:
Արժեքների ընդհանրության մասին հարցին անդրադառնալով՝ Կլիմովն օրինակ բերեց ԵՄ-ին. «Նրանք էլ ունեն ընդհանուր արժեքներ. օրինակ, որ մի մարդ կարող է սպանել մյուսին. իրենց մոտ դա կոչվում է «էվթանազիա». նման արժեքի, կներեք, բայց ես պատրաստ չեմ»:
Կլիմովը խոսեց նաև Վրաստանի հետ ՌԴ-ի հարաբերությունները վերականգնելու մասին. «Ռուսաստանի Դաշնությունը հայտարարել է, որ Սաակաշվիլիի հետո գործ չենք ունենալու, բայց դա չի նշանակում, որ գործ չենք ունենալու Վրաստանի խորհրդարանի կամ այլ կառույցների հետ: Պատերազմական շրջանում մենք երբեք ինքներս չենք սրել իրավիճակը, ընդհակառակը, Վրաստանն է խզել հարաբերությունները: Իսկ հիմա Վրաստանի իշխանությունները պիտի որոշակի քայլեր անեն, հետո՝ կտեսնենք: Եվ այո, ինչո՞ւ ենք խոսում Շվեյցարիայի միջոցով. ի՞նչ է, առանց Շվեյցարիայի չե՞նք կարող խոսել»,- ասաց նա:
Եվրասիական միությանը անդամակցում են ՀՀԿ-ն ու ԲՀԿ-ն. ըստ Կլիմովի՝ նրանք երկուսն էլ ներկայացնում են Հայաստանը, և դա շահեկան է Հայաստանի համար, քանի որ ունի մանդատների կրկնակի քանակ: «Մեր պայմանավորությունները երկու կուսակցությունների հետ նույնն են. նրանք երկուսն էլ այսօր հայտարարեցին, որ պիտի շարունակեն աշխատել այս կառույցի կայացման ուղղությամբ: Օրինակ՝ Ռուսաստանից մի կուսակցություն է, Ղազախստանից՝ մի կուսակցություն, Հայաստանից երկու կուսակցություն, ու երկուսն էլ նույն իրավունքներով՝ երկուական անդամով: Այսինքն՝ հսկայական Ռուսաստանից երկու մանդատ, Հայաստանից՝ չորս»:
Կլիմովի կարծիքով՝ Հայաստանի անդամակցությունը միայն շահեկան է մեր երկրին. «Եթե խոսենք ճշգրիտ, նույնիսկ՝ մի քիչ ցինիկ, Հայաստանը, իմ կարծիքով (իսկ ես այստեղ շատ եմ եղել) մի կողմից կարող է մնալ մենակ՝ ԵԱՀԿ-ի զեկույցների հետ, մյուս կողմից՝ կարող է փորձել շարունակել աշխատել իր հին գործընկերների հետ, ովքեր բոլորն էլ խոսում են ռուսերեն, թեպետ դա իրենց համար օտար լեզու է, ովքեր ճանաչում են իրար և հասկանում»:
Եթե Հայաստանն ընտրի առաջին ճանապարհը, Կլիմովը վստահ է, որ որոշ ժամանակ անց կցանկանա հետ գալ և վերականգնել կապերը Եվրասիական միության հետ: «Բայց այն անընդհատ առաջ է գնում, զարգանում: Եվ երբ դուք հասկանաք, որ Կլիմովը ճիշտ էր, ճանապարհը մինչև մեր հասած կետը շատ ավելի երկար կլինի: Ամենակարևորն այն է, որ դուք ձեր խնդիրներին դեմ առ դեմ չմնաք մենակ»,- եզրափակեց Կլիմովը: