Հնարավոր է՝ Մոլդովան Եվրամիության երկրներ մուտքի անայցագիր ռեժիմ ստանա մինչև 2013թ․ վերջ։ Այս մասին Քիշնևում տեղի ունեցած մամլո ասուլիսին հայտարարել է Մոլդովայում ԵՄ պատվիրակության ղեկավար Դիրք Շուբելը՝ նշելով, որ այս խնդիրը դժվար հասանելի է, սակայն իրական է։
Նրա խոսքով՝ վիզային ռեժիմի ազատականացման համար Մոլդովայի իշխանությունները դեռ պետք է շատ աշխատեն, և այդ նպատակին կարելի է հասնել ոչ շուտ, քան 2013թ․ վերջին։ Շուբելը նշել է, որ ամեն ինչ կախված է լինելու հանրապետության կողմից իրականացվող բարեփոխումների տեմպից։
Նա ասել է, որ Մոլդովայի իշխանություններն ընդունել են անհրաժեշտ օրենքների փաթեթը, և այժմ հարկ է՝ նրանք ապահովեն դրանց ճիշտ կիրառումը գործնականում։ Մոլդովայում ԵՄ պատվիրակության ղեկավարի խոսքով՝ Եվրահանձնաժողովը հետևելու է հանրապետության՝ ոչ խտրականության մասին օրենքի (որն ուժի մեջ կմտնի 2013թ․ հունվարի 1-ին), մրցակցության մասին օրենքի և կարևոր այլ փաստաթղթերի իրականացման ընթացքին։
Շուբելն ընդգծել է, որ վիզային ռեժիմի ազատականացումը Մոլդովայի քաղաքացիներին հնարավորություն կտա ազատ մեկնել Շենգենյան գոտու երկրներ՝ առանց վիզայի և այնտեղ գտնվել երեք ամսվա ընթացքում, սակայն դա նրանց աշխատանքի տեղավորվելու հնարավորություն չի տա։