ՄԱԿ-ի Զարգացման ծրագիրը կշարունակի աջակցել Հայաստանին

Վարչապետ Տիգրան Սարգսյանն ընդունել է Հայաստանում ՄԱԿ-ի Զարգացման ծրագրի (ՄԱԶԾ) մշտական ներկայացուցչի ժամանակավոր պաշտոնակատար Պատրիս Կյող-Բիզոյին, հաղորդում են կառավարության մամուլի ծառայությունից:

«Ուրախ եմ, որ պետք է համագործակցենք կարևոր ծրագրերի իրականացման գործում: Մենք կարևորում ենք ՄԱԿ-ի զարգացման ծրագրի գրասենյակի աշխատանքները Հայաստանի Հանրապետությունում և վերջին 20 տարում համատեղ իրականացված ծրագրերը հաջողված ենք համարում»,- ասել է վարչապետը:

Զրուցակիցները գոհունակությամբ նշել են, որ 1992-ից Հայաստանն ակտիվորեն մասնակցում է ՄԱԿ-ի շրջանակում ծավալվող աշխատանքներին ու համագործակցում կազմակերպության բազմաթիվ կառույցների և օղակների հետ: Այդ համատեքստում կողմերը կարևորել են համատեղ իրականացվող հազարամյակի զարգացման նպատակներին ուղղված ծրագրի, ինչպես նաև «Կանոնակարգիչ գիլյոտին» և «Հարավային Կովկասում սահմանների համալիր կառավարում» ծրագրերի շարունակական իրականացումը: Կառավարության ղեկավարը խոսել է նշված ծրագրերի արդյունավետության մասին, մանրամասներ ներկայացրել դրանց ընթացքի վերաբերյալ:

Պատրիս Կյող-Բիզոն հավաստիացրել է, որ ձևավորված բարձր մակարդակի համագործակցության շրջանակում ՄԱԶԾ-ի աջակցությամբ իրականացվող ծրագրերը կշարունակվեն: Նա նշել է, որ տարածաշրջանում Հայաստանը տնտեսական բավական լավ ցուցանիշներ է արձանագրում և բարձր է գնահատել գործարար միջավայրի բարելավմանն ուղղված ՀՀ կառավարության քայլերը: