Այսօր Երևանում տեղի է ունեցել Եվրամիության ֆինանսավորմամբ իրականացվող «Հայաստան-էլեկտրոնային կառավարման համակարգային զարգացում» ծրագրի շնորհանդեսը, որին մասնակցել են ՀՀ կառավարության աշխատակազմի ղեկավար Դավիթ Սարգսյանը, ՀՀ-ում Եվրահանձնաժողովի պատվիրակության ղեկավար, դեսպան Տրայան Հրիսթեան և ծրագրի ղեկավար Իվառ Թալլոն, հաղորդում են կառավարության մամուլի ծառայությունից:
Դավիթ Սարգսյանը տեղեկացրել է, որ ծրագրի շրջանակում ՀՀ կառավարության կողմից 2012-2014 թթ. ներդրվելու են էլեկտրոնային կառավարման 7 նոր համակարգեր՝ արխիվների թվայնացում, էլեկտրոնային փոստ՝ ՀՀ յուրաքանչյուր քաղաքացու համար, քաղաքացիական կացության ակտերի գրանցման էլեկտրոնային համակարգ (ՔԿԱԳ), էլեկտրոնային վիճակագրական հաշվետվություններ, էլեկտրոնային առողջապահական համակարգ, շինարարական թույլտվությունների տրամադրման էլեկտրոնային համակարգ և էլեկտրոնային հյուպատոսություն:
«Արտերկրում գտնվող ՀՀ քաղաքացիների անձնագրի ժամկետի երկարաձգումը և փաստաթղթաշրջանառությունը հյուպատոսական հիմնարկներում կտևեն մինչև 15 րոպե՝ ներկայիս օրերի և շաբաթների փոխարեն»,- ասել է Դավիթ Սարգսյանը:
Տեղեկացվել է, որ ներկայում հանրապետությունում ներդրվել է 12 հազ. նույնականացման քարտ, ինչի արդյունքում քաղաքացիները կունենան էլեկտրոնային ստորագրություն, առցանց կօգտվեն էլեկտրոնային ծառայություններից: Նույնականացման քարտում կլինի մարդու բժշկական պատմությունը, որը կապահովի նաև ապահովագրական վճարների իրականացումը և պետական պատվերի ֆինանսավորումը:
Ներկայացնելով էլեկտրոնային կառավարման համակարգային զարգացման շրջանակներում 2008-2012թթ. իրականացված բարեփոխումների արդյունքները՝ Դավիթ Սարգսյանը նշել է, որ մի շարք ոլորտներում ներդրվել է էլեկտրոնային կառավարման 15 համակարգ:
Պետական 40 մարմինների ներքին և միջկառավարական փաստաթղթաշրջանառությունն իրականացվում է էլեկտրոնային եղանակով, 10 հազարից ավելի քաղծառայողներ ամեն օր օգտագործում են փաստաթղթաշրջանառության էլեկտրոնային կառավարման համակարգը: Փաստաթղթերի 90 տոկոսը մշակվում է համակարգիչների միջոցով, 65 տոկոսից ավելին էլ փոխանակվում է էլեկտրոնային եղանակով, Հայաստանի ամենահեռավոր շրջաններ փաստաթղթերի առաքման ժամանակը կազմում է մեկ րոպեից պակաս: Յուրաքանչյուր տարի 10 հազ-ից ավելի քաղաքացիներ առցանց դիմում են ՀՀ պետական մարմիններին, և յուրաքանչյուր տարի 20 հազ-ից ավելի քաղաքացիներ ՀՀ պետական մարմիններում իրենց դիմումներին հետևում են առցանց:
Իրավաբանական անձանց գրանցման մեկ պատուհանի համակարգի ներդրման արդյունքում գրանցումների 10 տոկոսը կատարվում է առցանց, ՍՊԸ-ների 65 տոկոսը գրանցվում է 30 րոպեից պակաս ժամանակում, ԱՁ-ների 85 տոկոսը գրանցվում է 10 րոպեից պակաս ժամանակում: Ընկերությունների վերաբերյալ տեղեկությունները տրամադրվում են առցանց:
Հարկային հայտարարագրերի ներկայացման էլեկտրոնային համակարգով 59 տեսակի հաշվետվությունների ձևեր ներկայացվում են էլեկտրոնային եղանակով, ինչը նպաստել է նաև հակակոռուպցիոն քաղաքականությանը: Այս տարի բացառապես էլեկտրոնային եղանակով հաշվետվություն են ներկայացրել 15 675 հարկատուներ, հանձնվել են 263 656 էլեկտրոնային հաշվետվություններ:
Ինտերակտիվ բյուջեի համակարգի միջոցով հնարավորություն է ստեղծվել առցանց տեսնել բյուջեի մուտքերը և ծախսերը: Իսկ այս տարի գործարկվել է պետական վճարումների էլեկտրոնային համակարգը, ինչը հնարավորություն է տվել պետական բոլոր վճարումները կատարել առցանց: