ԱՄՆ-ում Տ․Սարգսյանին բնապահպանները ցույցով են դիմավորել

ԱՄՆ-ում աշխատանքային օրվա երկրորդ կեսին վարչապետ Տիգրան Սարգսյանն այցելել է Հայ Առաքելական Եկեղեցու Արևմտյան Թեմի առաջնորդարան, հաղորդում են կառավարության մամուլի ծառայությունից:

Արևմտյան Թեմի առաջնորդ արքեպիսկոպոս Հովնան Տերտերյանը ՀՀ կառավարության ղեկավարին ծանոթացրել է թեմի աշխատանքներին և ծրագրերին: Այնուհետև վարչապետը հանդիպել է Հարավային Կալիֆոռնիայի հայ համայնքի ներկայացուցիչներին, պատասխանել նրանց հուզող հարցերին, որոնք վերաբերել են Հայաստանի արտաքին և ներքին խնդիրներին:

Հանդիպումից հետո Տիգրան Սարգսյանը մոտեցել է առաջնորդարանի մոտ հավաքված Թեղուտի պաշտպանության քաղաքացիական նախաձեռնության ամերիկաբնակ ակտիվիստներին, ովքեր իրենց անհանգստությունն են փոխանցել վարչապետին` Հայաստանում բնապահպանական, մասնավորապես, հանքերի շահագործման խնդիրների հետ կապված:

«Մենք ուշադիր հետևում ենք ձեր շարժմանը, տեղյակ ենք ձեր մտահոգությունների մասին, ավելին՝ բազմաթիվ հանդիպումներ ենք ունենում շարժման ներկայացուցիչների հետ»,- ցուցարարներին ուղղված իր խոսքում ասել է վարչապետը:

Տիգրան Սարգսյանը նշել է,  որ  ողջունել է հասարակական կազմակերպությունների գործունեությունը, ակտիվությունը և նախաձեռնությունները, քանի որ դրանք բխում են ժողովրդի շահերից: «Եթե չկա ակտիվություն, եթե չկա այս կամ այն բնագավառում ոլորտի շահերը պաշտպանող կազմակերպություն, մարդիկ, ովքեր  նվիրված են այդ գաղափարներին և ովքեր գաղափարն առաջ են տանում, քաղաքացիական հասարակություն հնարավոր չէ կառուցել: Կառավարության պարտականություն է ձեզ համար ստեղծել այդպիսի հնարավորություններ, որպեսզի դուք կարողանաք ազատորեն հնչեցնել ձեզ մտահոգող հարցերը»,- ասել է վարչապետը:

Վարչապետի խոսքով՝ շարժումը տալիս է դրական արդյունքներ, պետական կառույցները հաշվի են առնում շարժման կողմից հնչեցրած կարծիքը: «Կառավարությունը նույնպես աջակցում է ձեր այդ շարժմանը: Ես համոզված եմ, որ այս երկխոսությունն օգտակար է մեր ժողովրդի, պետության համար: Իհարկե, կան ձեր կողմից ներկայացված բազմաթիվ պահանջներ, որոնց լուծումները խնդրահարույց են, բայց մենք պատրաստ ենք նստել, քննարկել այդ հարցերը և փորձել գտնել այնպիսի լուծումներ, որոնք կբավարարեն նաև ձեզ: Ցանկանում եմ  նաև իմ ուրախությունը հայտնել առ այն, որ ձեզանից շատերը մտադիր են վերադառնալ Հայաստան: Մեծ սիրով հրավիրում եմ ձեզ հայրենիք»,- ասել է Տիգրան Սարգսյանը:

Վարչապետի այցն ԱՄՆ շարունակվում է: Դեկտեմբերի 11-ին Տիգրան Սարգսյանը կմասնակցի «ԱրմԹեք 2012» համաժողովի բացմանը: