Դեպի նախագահական ընտրություններ ճանապարհին ես առաջնորդվում եմ և՛ ռոմանտիզմով, դրա հիմքում սերն է, և՛ պրագմատիզմով. «Հ1» հեռուստատեսության «Հարցազրույց» հաղորդման շրջանակում նշեց ԱԻՄ առաջնորդ Պարույր Հայրիկյանը:
«Ես գիտեմ, որ հիմա կարող եմ էականորեն օգնել իմ ժողովրդին: Այստեղ չկա խաղադրույքի հարց, կա միայն հայրենիքի հարց, որին պիտի փորձես օգտակար լինել: Այսօր պայմաններն ավելի լավն են, նախագահը չի կարող քնից զարթնել և պառլամենտին բոլոր իրավունքներից զրկել: Եվ ես հավատում եմ, որ ԱԻՄ-ից ծնված Հանրապետականը կարող է և ինձ հետ լինել: Ես ընդամենը երկու տարով եմ ընտրվելու՝ ոչ Հանրապետականն է իմ ընտրվելով կորցնելու, ոչ՝ Բարգավաճը, ոչ՝ մյուսները»,- նշեց նա:
Հայրիկյանն այսօր ցանկանում է մասնակցել ընտրություններին, քանի որ ոչ նախագահական կարգավիճակում չի կարող իրականացնել իր «Կատարյալ ժողովրդավարության մոդելը»: «Նաև, Հայաստանն այսօր գոյատևում է միջազգայնորեն ընդունված հայկական տարածքների միայն 20 տոկոսի վրա՝ ես չեմ խոսում ինչ-որ օկուպացիոն տարածքների մասին, ես մեր տարածքների մասին եմ խոսում»,- նշեց նա: Թվարկված խնդիրների լուծման ուղղությամբ Հայրիկյանը շարունակելու է աշխատել՝ անկախ նախագահական ընտրությունների ելքից:
«Այն, ինչ ես ասում եմ, որ կանեմ երկու տարում, ես վստահ եմ, որ կանեմ վեց ամսում»,- նշեց նա: Հայրիկյանը կկամենար լիներ միասնական թեկնածու՝ «ոչ թե ընդդիմության միասնական թեկնածու»: «Եվ ես չեմ բացառում, որ վաղը Սերժ Սարգսյանը կասի՝ բարի, եթե դա է քո առաջարկը, քեզ կսատարեմ: Մանավանդ, որ նախագահությունը միայն հավելյալ իրավունք է իր համար, ինքը առանց դրա էլ ունի խորհրդարանական մեծամասնություն»,- ասաց նա: