Թուրքմենստանում ուժի մեջ է մտել երկրի պատմության մեջ առաջին օրենքը, որը կարգավորում է զանգվածային լրատվամիջոցների գործունեությունը:
«Իտար-Տասս»-ի հաղորդմամբ, համապատասխան հրամանն այսօր ստորագրել է երկրի նախագահ Գուրբանգուլի Բերդիմուհամեդովը:
Նոր օրենքով երկրի քաղաքացիներն անխոչընդոտ հասանելիություն ունեն արտասահմանյան լրատվամիջոցներին, արգելվում է գրաքննությունը եւ լրագրողների գործունեության խոչընդոտումը:
Առաջին անգամ Թուրքմենստանի բնակիչները օրենքով իրավունք ստացան օգտագործել լրատվամիջոցները կարծիքներ, համոզմունքներ արտահայտելու ինչպես նաեւ տեղեկատվություն ստանալու եւ տարածելու համար:
Լրատվամիջոցների զարգացման համար պետությունը բյուջեից գումար կտրամադրի:
Ներկայում Թուրքմենստանում գործում է միայն մեկ լրատվական գործակալություն, յոթ ազգային հեռուստաալիքներ, հինգ տեղական ռադիոկայաններ եւ 39 տպագիր պարբերականներ, ընդ որում կենտրոնական թերթերի հիմնական հիմնադիրը համարվում է նախագահը:
