Վարչապետ Տիգրան Սարգսյանը ցավակցական հեռագիր է հղել ժողովրդական արտիստ Վլադիմիր Աբաջյանի մահվան կապակցությամբ:
Հեռագրում մասնավորապես ասված է. «Խոր վշտով տեղեկացա ՀԽՍՀ ժողովրդական արտիստ Վլադիմիր Աբաջյանի մահվան մասին: Կյանքի 86-րդ տարում վախճանվեց հայ թատրոնի, կինոյի և ազգային ասմունքի մեծերից մեկը, ում կերտած կինոյի, հեռուստատեսային ու ռադիոբեմադրությունների դերերը մշտապես կմնան մեր ժողովրդի հիշողության մեջ:
Այս ծանր պահին ցավակցում և հոգու տոկունություն եմ մաղթում մեծն վարպետի ընտանիքի անդամներին, հարազատներին, գործընկերներին և հազարավոր երկրպագուներին»:
Ինչպես հաղորդում են կառավարության մամուլի ծառայությունից, Վլադիմիր Աբաջյանի մահվան կապակցությամբ ստեղծվել է կառավարական հանձնաժողով` Տիգրան Սարգսյանի գլխավորությամբ:
