Բնապահպանական խնդիրների դեմ բոլոր պայքարել ցանկացողներն այսուհետ կարող են միավորվել Համահայկական բնապահպանական ճակատում (ՀԲՃ), որի ստեղծման մասին այսօր լրագորղների հետ հանդիպմանը հայտարարեցին բնապահպան ակտիվիստներ Մարիամ Սուխուդյանը, Լևոն Գալստյանը, Եղիա Ներսեսյանը և Վաչե Թովմասյանը:
Նրանց խոսքով` ՀԲՃ-ի նպատակը պետք է լինի հայրենի բնության պահպանության, տնտեսության բանական զարգացման և սոցիալական արդարության ապահովումը: Այս նպատակին հասնելու ճանապարհին ՀԲՃ-ն հետամուտ է լինելու բնական միջավայրի պահպանմանը, վերականգնմանն ու զարգացմանը, բնական ռեսուրսների ռացիոնալ օգտագործմանը և վերարտադրությանը, շրջակա միջավայրի վրա տնտեսական և այլ գործունեության բացասական հետևանքների կանխմանը և վերացմանը, սոցիալական արդարության սկզբունքով բնական ռեսուրսների օգտագործման արդյունքների բաշխմանը:
Նշված նպատակին հասնելու և խնդիրների իրականացման համար ՀԲՃ-ն առաջարկում է ձևավորել բնապահպանական մոնիթորինգի և գործողությունների կազմակերպման ու համակարգման համահայկական ցանց, որի գործունեությունն իրականացնելու համար կստեղծվի համակարգող խորհուրդ: Այն համակարգելու է տարածքային և ոլորտային սկզբունքներով ձևավորված աշխատանքային խմբերի գործունեությունը:
Աշխատանքային խմբերն առաջարկվում է ձևավորել ըստ ենթաոլորտային խնդիրների: Առաջարկվում է կառույցներ ձևավորել Երևանում, Գյումրիում, Վանաձորում, Ստեփանակերտում, իսկ արտերկրի հայության մասով` Լոս Անջելեսում և Մոսկվայում:
ՀԲՃ-ի բնականոն գործունեության ապահովման համար նախատեսվում է ստեղծել նաև բնապահպանական հիմնադրամ:
