Facebook սոցցանցն արգելափակել է ռուսական Yandex որոնողական համակարգի թողարկած Wonder բջջային ծրագրի մատչումը սոցցանցի տվյալների նկատմամբ, հաղորդում է TechCrunch-ը:
Որպես Wonder-ի արգելափակման պատճառ նշվում է այն, որ Մարկ Ցուկերբերգի ընկերությունն արգելում է սոցցանցի տվյալների գործածումն առանց սոցցանցի համաձայնության: Միաժամանակ` հաղորդվում է, որ Wonder բջջային ծրագիրը շարունակում է համագործակցությունը Twitter, Foursquare և Instagram ծառայությունների հետ:
Նշենք, որ անցած շաբաթ Facebook-ը ներկայացրել էր սոցցանցի ներսում որոնման սեփական ծառայությունը` Graph Search, որը թույլ է տալիս օգտատիրոջ մասին տեղեկություններ ստանալ` օգտագործելով նրա անձնական տվյալները:
Հիշեցնենք, որ սմարթֆոնների համար նախատեսված Wonder ծրագրի շնորհիվ հնարավոր է տեղեկանալ օգտատիրոջ ընկերների այցելած ժամանցի վայրերի, առևտրի կենտրոնների և այլ հաստատությունների մասին: Այն հասանելի է ամերիկյան Apple ընկերության թողարկած iPhone սմարթֆոնների, iPad պլանշետների և iPod touch նվագարկիչների համար և գործում է միայն ԱՄՆ տարածքում:
