Ադրբեջան-Իրան հարաբերությունների ամբողջական կարգավորման համար Իլհամ Ալիևը կրկին նախապայման է ներկայացրել։ Ըստ Ադրբեջանի նախագահի, ադրբեջանա-իրանական հարաբերությունները լիարժեքորեն կկարգավորվեն, եթե 2023-ի հունվարին Իրանում Ադրբեջանի դեսպանատան դեմ հարձակում գործած անձը պատժվի։ Ալիևն այս մասին խոսել է Ադրբեջանի դիվանագիտական ակադեմիայի կազմակերպած համաժողովի ժամանակ։
«Մեր պետությունների միջև հարաբերությունների լիակատար կարգավորման համար այդ ահաբեկիչը [հարձակում գործած մարդուն] և նրա հետևում կանգնածները պետք է դատարանի առջև պատասխան տան և պատժվեն»,- հայտարարել է Ալիևը՝ նշելով, որը ադրբեջանական կողմը «չի կարող մոռանալ այդ իրադարձությունը»։
2023-ի հոնվարի 27-ին Թեհրանում Ադրբեջանի դեսպանատան վրա հարձակումը սրել էր երկու կողմի՝ առանց այդ էլ բարդ հարաբերությունները։ Հարձակման ժամանակ դեսպանատան աշխատակից էր մահացել։ Բաքուն հարձակումն անմիջապես «ահաբեկչություն» էր որակել՝ Իրանի իշխանություններից պահանջելով հարձակվողին ամենախիստ պատժի ենթարկել։
Այս տարվա հունվարին Իրանի Բարձր դատարանը հաստատել էր Ադրբեջանի դեսպանատան վրա հարձակված անձին մահապատժի ենթարկելու որոշումը։ Միևնույն ժամանակ դատական իշխանության ներկայացուցիչը հայտարարել էր, որ հաջորդ քայլերը կկիրառվեն, եթե զոհվածի հարազատները հատուցում պահանջեն։
Ըստ մամուլի հաղորդագրությունների՝ առաջիկայում նախապատրաստվում է Իրանի նախագահ Մասուդ Փեզեշքիանի այցն Ադրբեջան։ Իրանի նախագահը պատրաստվում է այցելել նաև Հայաստան։ Այդ մասին հայտարարել էր Իրանի արտգործնախարար Աբբաս Արաղչին Երևան կատարած այցի ընթացքում։
