Այս պահին սահմանին կուտակումներ չկան, առաջնագծում իրադրությունը հարաբերականորեն կայուն է։ Այն կրակոցները, որոնց մասին խոսվում է, դրանք ոչ նշանառու կրակոցներ են, անհասցե։ Այս մասին ասել է ՀՀ պաշտպանության փոխնախարար Արման Սարգսյանը՝ Աժ-ում լրագրողների հետ զրույցում։
«Մեր լրատվական ծառայության կողմից տրամադրված տեղեկության միջև որևէ հակասություն չկա։ Այս պահին կուտակումներ չկան: Երբ պաշտոնական տեղեկատվությունը ձեզ համար արժանահավատ չէ, իսկ դուք հավատալու եք տեսանյութերին, ապա կարծում եմ՝ ինձանից չպետք է հարցնեք»,- ասել է փոխնախարարը։
Սարգսյանն ասել է, որ լրատվությունը նախարարության կողմից տրվում է բաց և օբյեկտիվ, երբ կա խնդիր, դրա մասին նախարարությունը հայտնում է։
«Զինված ուժերն իրենց լիազորությունների և պարտականությունների շրջանակներում, բնականաբար, կատարում են իրենց աշխատանքը և առաջնահերթ խնդիրն անվտանգության ապահովումն է այս պահին, ես նորից ցանկանում եմ կրկնել, որ առաջնագծում հարաբերականորեն կայուն իրավիճակ է և որևէ խնդիր ծագելու պարագայում մենք անմիջապես տեղեկատվություն կտրամադրենք»,- նշել է Սարգսյանը։
Փոխնախարարի այս հայտարարությունից հետո ՀՀ պաշտպանության նախարարությունը հաղորդեց, որ ապրիլի 13-ին՝ ժամը 22:20-ի սահմաններում, Ադրբեջանի ԶՈՒ ստորաբաժանումները կրակ են բացել Սյունիքի մարզի Խնածախ բնակավայրի ուղղությամբ, ինչի հետևանքով վնասվել է գյուղի մշակույթի տունը: Տուժածներ չկան։
Մեկ ամսից ավելի, Ադրբեջանի ՊՆ-ն գրեթե ամենօրյա ռեժիմով հաղորդագրություններ է տարածում, թե իբր ՀՀ ԶՈՒ-ն կրակում է ադրբեջանական դիրքերի ուղղությամբ։ ՀՀ ՊՆ-ն բոլոր այդ հաղորդագրությունները հերքում է։
Ադրբեջանական զինված ուժերը մարտի 31-ին ևս թիրախավորել էին Խնածախը, ինչի հետևանքով բնակելի տուն էր վնասվել, ոչ ոք չէր տուժել։
