«Հայաստանը պետք է հստակ դիրքորոշում հայտնի, թե արևմտյան ադրբեջանցիները երբ և ինչ պայմաններում կկարողանան վերադառնալ իրենց նախնիների հողերը». սա Ադրբեջանի նախագահ Իլհամ Ալիևի ուղերձից մի հատված է, որը ներկայացվել է Անկարայում «Վերադարձն Արևմտյան Ադրբեջան՝ որպես մարդու իրավունքների գերակայության կարևոր պայման» խորագրով միջազգային կոնֆերանսին։
«Մենք ակնկալում ենք, որ Հայաստանի ղեկավարությունը կընդունի համայնքի ներկայացուցիչներին այս հարցի կապակցությամբ։ Այս հարցը չի հանվի Ադրբեջանի օրակարգից մինչև վերադարձը տեղի չունենա»,- Ալիևի ուղերձից մեջբերում են ադրբեջանական կայքերը։
Ալիևը նշել է, թե իրենց այս ցանկությունը չի նշանակում, որ տարածքային պահանջներ են ներկայացնում Հայաստանի նկատմամբ։
«Ես կցանկանայի հատուկ ընդգծել, որ արևմտյան ադրբեջանցիների վերադառնալու ցանկությունը չի նշանակում տարածքային պահանջներ ներկայացնել Հայաստանի նկատմամբ։ Այս հարցը չի հանվի Ադրբեջանի օրակարգից մինչև վերադարձը տեղի չունենա։ Բնականաբար, իրենց հայրենի հողեր վերադարձող արևմտյան ադրբեջանցիներին նույնպես պետք է տրամադրվեն անվտանգության երաշխիքներ»,- ասված է Ադրբեջանի նախագահի ուղերձում։
Ալիևը նաև նշել է, որ Ադրբեջանի նպատակն է այս համաժողովի միջոցով բարձրացնել «Արևմտյան Ադրբեջանի» իրազեկվածությունը միջազգային հանրության շրջանում։
