Մայիսի 1-ի դրությամբ Հայաստանից հեռացել է 12,000 արցախցի 

2025-ի մայիսի 1-ի դրությամբ Հայաստանից մեկնել է 28,762 բռնի տեղահանված արցախցի, վերադարձել՝ 16,702-ը: Այսինքն, 2023-ի սեպտեմբերի բռնի տեղահանությունից հետո այս տարվա մայիսի 1-ի դրությամբ Հայաստանից հեռացել և (դեռ) չի վերադարձել 12,060 արցախցի։ Տվյալները ՍիվիլՆեթին տրամադրել է Հայաստանի ազգային անվտանգության ծառայությունը (ԱԱԾ)։

Ապրիլի 1-ի դրությամբ Հայաստանից հեռացել և չի վերադարձել 11,323 անձ, ինչը ցույց է տալիս, որ մի ամսում չվերադարձողների թիվն աճել է 737-ով։

ՍիվիլՆեթը բռնի տեղահանված արցախցիների միգրացիային հետևում է 2023-ի դեկտեմբերից։ Այդ ժամանակվանից մինչև 2025-ի մայիսը միջին հաշվով ամեն ամիս Հայաստանից հեռանում և չի վերադառնում ավելի քան 300 արցախցի։

Նախորդ ամիսներին՝ 2024-ի հոկտեմբերից մինչև 2025-ի ապրիլ, վերադարձող արցախցիների թվի նույնիկ չնչին, սակայն որոշակի աճ էր նկատվում (տե՛ս գրաֆիկը)։

2023-ի հոկտեմբերի 26-ին ՀՀ կառավարությունն ընդունեց որոշում, որով արցախցիներին ժամանակավոր պաշտպանության տակ է վերցնում և նրանց օրենքի ուժով ճանաչում փախստական։

Միգրացիայի և քաղաքացիության ծառայությունից հունվարին Ինֆոքոմին հայտնել էին, որ բռնի տեղահանվել է շուրջ 150,000 անձ և նշել էին, որ հստակ թիվ հայտնել հնարավոր չէ: