Civilnet
Մոտ ապագայում կտեսնենք ֆրանսիական ընկերությունների ներգրավում՝ Սյունիքի համար ռազմավարական նշանակություն ունեցող ենթակառուցվածքային ծրագրերում։ Այս մասին հայտարարել է ԱԳ փոխնախարար Վահան Կոստանյանը՝ Գորիսում մեկնարկած Հայաստան-Ֆրանսիա ապակենտրոնացված համագործակցության 5-րդ համաժողովի ընթացքում։
«Այս համաժողովի անցկացումն այստեղ՝ Գորիսում, բնական ու սպասելի զարգացում է՝ հաշվի առնելով Սյունիքի՝ մեր երկրի համար ունեցած ռազմավարական նշանակությունը»,- ընդգծել է Վահան Կոստանյանը՝ նշելով, որ Հայաստանի կառավարությունը հետևողականորեն առաջ է տանում այդ շրջանների զարգացման և դիմակայունության ամրապնդման օրակարգը։
Փոխնախարարը կարևորել է Ֆրանսիայի դերը Հայաստանի համար։ Նա ընդգծել է, որ Ֆրանսիայի աջակցությունը ՀՀ ինքնիշխանությանը, տարածքային ամբողջականությանը և ժողովրդավարության հետագա ամրապնդմանը ոչ միայն բարձր է գնահատվում, այլև ընկալվում է որպես կենսական։ Ըստ նրա՝ թե՛ երկկողմ ձևաչափով, թե՛ ԵՄ-ի հետ համագործակցությամբ, Ֆրանսիան հետևողական է եղել Հայաստանի պաշտպանունակության և տնտեսական դիմակայունության ամրապնդման գործում։
«Մենք առանձնակի կարևորում ենք Ֆրանսիայի աջակցությունը՝ ՀՀ-ԵՄ գործընկերության խորացման և Եվրոպային առավել մոտենալու մեր ձգտումներում»,- ասել է Կոստանյանը՝ հավելելով, որ այս ամենը ոչ միայն քաղաքական աջակցություն է, այլև գործնական ներգրավվածություն։
Կոստանյանն ընդգծել է նաև Ֆրանսիայի պատվավոր հյուպատոսի գրասենյակի պաշտոնական բացման կարևորությունը Գորիսում՝ սա համարելով հստակ քաղաքական կամքի դրսևորում։
Այսօր՝ հունիսի 2-ին, Գորիսում Ֆրանսիայի պատվո հյուպատոսի գրասենյակ կբացվի։
«Հայաստանն ու Ֆրանսիան երբեք այսքան մոտ չեն եղել միմյանց։ Մեր հարաբերությունները գտնվում են աննախադեպ բարձր մակարդակի վրա, և այս համագործակցությունը նպատակ ունի նաև օժանդակել Հայաստանին՝ հաղթահարելու տարածաշրջանային մարտահրավերները», - շեշտել է փոխարտգործնախարարը։
Նա ընդգծել է, որ համագործակցությունը շարունակում է ընդլայնվել բոլոր ոլորտներում՝ միաժամանակ արձանագրելով Հայաստանի կողմից տևական խաղաղության հաստատման ուղղությամբ արվող ջանքերը։ Կոստանյանը հիշեցրել է, որ Հայաստանն իր հանձնառությունն է ամրագրել տարածքային ամբողջականության, ինքնիշխանության և սահմանների անխախտելիության սկզբունքների նկատմամբ՝ Ալմա-Աթայի հռչակագրով։
Անդրադառնալով տարածաշրջանային խաղաղությանը՝ նա ասել է, որ Հայաստանը պատրաստ է անհապաղ ստորագրել և վավերացնել խաղաղության համաձայնագիրը։ Նրա խոսքով՝ այդ համաձայնագրով կարելի է բացել խաղաղ համակեցության նոր դարաշրջան տարածաշրջանում։ Նա վստահեցրել է՝ մտահոգությունները հասցեագրելու ամենակարճ և արդյունավետ ճանապարհը հենց այդ համաձայնագրի ստորագրումն է։
Պատմություններ
