Հայաստանի հետ վիզայի ազատականացման երկխոսությունն ակտիվ փուլում է. ԵՄ դեսպան

Հայաստանի հետ ԵՄ վիզաների ազատականացման երկխոսությունն ակտիվ փուլում է: Այս մասին հայտարարել է ԵՄ դեսպան Վասիլիս Մարագոսը՝ Հայաստան-Եվրոպական Միություն  քաղաքացիական հասարակության պլատֆորմի 2024-ի հաշվետվության ներկայացման ընթացքում:

«Վիզայի ազատականացման երկխոսությունը մենք սկսել ենք անցյալ տարվա հուլիսին, և սա շատ հստակ ուղղություն է։ Այժմ այս գործընթացը գտնվում է ակտիվ փուլում, և մենք ունենք կոնկրետ բարեփոխումների ուղղություններ ու ոլորտներ»,-  հայտարարել է Մարագոսը։

Նրա խոսքով՝ Եվրամիությունը սերտ համագործակցում է Հայաստանի իշխանությունների հետ՝ վիզաների ազատականացման երկխոսության գործողությունների ծրագրի ուղղությամբ, որը կսահմանի անհրաժեշտ բարեփոխումները։

Դեսպանը նշել է, որ բարեփոխումները ներառում են անվտանգություն, սահմանների կառավարում, կենսաչափական փաստաթղթավորում, անձնական տվյալների պաշտպանություն։ Նա կարևորել է նաև քաղաքացիական հասարակության, մասնավոր հատվածի և սոցիալական աշխատողների ներգրավվածությունը՝ ընդգծելով, որ վիզաների ազատականացումը պահանջում է համընդհանուր  մոտեցում։

Օրեր առաջ ՆԳՆ-ից հայտնել էին, որ Հայաստան-ԵՄ վիզաների ազատականացման գործողությունների ծրագիրը շուտով կփոխանցվի հայկական կողմին։