Civilnet
Հայկական դրամը, ամենայն հավանականությամբ, առաջիկա մեկ-երկու ամիսների ընթացքում կտրուկ կուժեղանա՝ պայմանավորված տարածաշրջանային դրական գործոններով, մասնավորապես՝ Ադրբեջանի հետ առևտրային սահմանների հնարավոր բացմամբ։ Այսպիսի եզրակացություն են անում KK Partners խորհրդատվական ընկերության վերլուծաբաններ Եղիշե Քերոբյանը, Աստղիկ Աբոյանը և Արաքսյա Նիկողոսյանն իրենց ընկերության էջում հրապարակած հոդվածում։
Հեղինակների գնահատմամբ՝ դրամի ներկայիս «հանգիստ» փուլը կարող է լինել հերթական շրջադարձային պահը։ Եթե նախկինում նման կայուն շրջաններից հետո արժույթը սովորաբար արժեզրկվել է, այս անգամ հավանական է հակառակը՝ դրամի արժևորման փուլ։ Դրան նպաստում են մի շարք դրական գործոններ՝ տնտեսական վստահության վերականգնումը, խաղաղության համաձայնագրից հետո ներդրումային միջավայրի բարելավումը, ինչպես նաև տարածաշրջանային առևտրի նոր հնարավորությունների բացվելը։
Վերջին հինգ տարիներին հայկական դրամը դարձել է տարածաշրջանի ամենակայուն արժույթներից մեկը՝ դիմակայելով պատերազմին, շրջափակումներին և քաղաքական անորոշությանը։ 2020-ի պատերազմից հետո դրամը արժեզրկվեց՝ հասնելով մոտ 540 դրամ 1 դոլարի դիմաց, սակայն հետագայում վերականգնվեց։ 2022-ին ռուս-ուկրաինական պատերազմի ֆոնին դրամը կտրուկ ամրապնդվեց՝ հասնելով շուրջ 385 դրամի՝ վերջին տասնամյակների ամենաուժեղ մակարդակին։
Նույնիսկ 2022-2023 թթ․ Արցախի շրջափակման ընթացքում դրամը պահպանեց կայունությունը, իսկ 2023-ի սեպտեմբերյան իրադարձություններից հետո կարճատև անկումից հետո (Արցախի էթնիկ զտում), դրամը վերականգնվեց Կենտրոնական բանկի միջամտությամբ։
2025-ի մայիսից սկսած դրամը պահպանել է բացառիկ կայունություն․ քաղաքական անորոշությունը նվազել է, ներդրումային հոսքերը՝ աճել, իսկ Moody’s-ն ու Fitch Ratings-ը պահպանել են Հայաստանի վարկային կայուն կանխատեսումները։
KK Partners-ի վերլուծաբանները նշում են, որ եթե դիտարկենք դրամի պատմական շարժումները՝ կայունության փուլերը գրեթե միշտ ավարտվել են շուկայի կտրուկ տեղաշարժով։ Այս անգամ, հաշվի առնելով բարենպաստ տնտեսական ու քաղաքական միտումները, նրանք կանխատեսում են դրամի կտրուկ ամրապնդում առաջիկա մեկ-երկու ամիսների ընթացքում։
Պատմություններ
