Մարդու իրավունքների պաշտպանի գրասենյակը հաղորդագրություն է տարածել, որում նշվում է, որ ՊԵԿ-ը պետք է պատասխանատվություն կրի էլեկտրոնային հաշվետվությունների համակարգի խափանման համար:
Հաղորդագրությունում մասնավորապես ասված է. «Սույն թվականի փետրվարի 13-ին ՀՀ ԿԱ պետական եկամուտների կոմիտեի կողմից գործարկվել է «Եկամտային հարկի և պարտադիր կուտակային վճարի անձնավորված հաշվառման», այսինքն՝ էլեկտրոնային հաշվետվությունների համակարգը: Գործարկվելուց գրեթե անմիջապես հետո հարկատուների շրջանում անհանգստություն էր առաջացել համակարգի անսարքության պատճառով։ Մտահոգվելով, որ բազմաթիվ հարկատուներ համակարգի անսարքության պատճառով կարող են ենթարկվել ոչ իրավաչափ պատասխանատվության, որն էլ իր հերթին կարող է ֆինանսական բեռ հանդիսանալ այդ անձանց վրա՝ Մարդու իրավունքների պաշտպան Կարեն Անդրեասյանը հարկ էր համարել անդրադառնալ այս խնդրին։
Խնդիրն այն է, որ օրենքով սահմանված ժամկետներում հարկատուների կողմից հաշվետվություններ չներկայացնելը կարող է նրանց պատասխանատվության ենթարկելու հիմք հանդիսանալ, իսկ համակարգի անսարքությունը խոչընդոտում է հարկատուների կողմից իրենց պարտականությունների պատշաճ կատարմանը։ Անհանգստացնող ենք համարում այն, որ Պետական եկամուտների կոմիտեն համակարգի խափանումը հիմնավորում է մի շարք արտաքին տեխնիկական պատճառներով՝ խուսափելով պատասխանատվություն կրել համակարգի վերահսկողության և անխափան աշխատանքի համար, քանի որ խնդիրն ուղղակիորեն վերաբերում է հարկային իրավահարաբերությունների սուբյեկտներին։
Տնտեսվարողների ազատ զարգացման համար ծայրահեղ անհրաժեշտ է շարունակել բարելավել հարկային և մաքսային վարչարարությունը. հետևաբար Պաշտպանը շարունակելու է հետևել Պետական եկամուտների կոմիտեի գործունեությանը և առաջիկայում ըստ անհրաժեշտության կներկայացնի նաև այլ խնդիրների վերաբերյալ իր դիտողություններն ու առաջարկությունները»։
Հատկանշական է, որ փետրվարի 20-ին աշխատանքային խորհրդակցության ժամանակ վարչապետ Տիգրան Սարգսյանը հանձնարարել էր վարչական պատասխանատվության միջոցներ չկիրառել այն հարկատուների նկատմամբ, որոնք տեխնիկական խնդիրների պատճառով հաշվետվությունները հարկային մարմիններ ուշացումով են ներկայացրել։ Պետեկամուտների կոմիտեի նախագահ Գագիկ Խաչատրյանը, իր հերթին, լրագրողներին վստահեցրել էր, որ վարչական տուգանքներ չեն կիրառի, մինչև համակարգը լիարժեք չգործի։
