2013թ. եվրոպական ավտոկոնցեռնները տարածաշրջանում վաճառքների զգալի աճ են կանախատեսել՝ դրանց ներկայիս անկման ֆոնին, վկայում են 300 ընկերությունների շրջանում PricewaterhouseCoopers (PwC) միջազգային աուդիտորական ընկերության իրականացրած հարցման արդյունքները։
Ընկերությունների մեծ մասը՝ 75-ը, ներկայացնում է Գերմանիան, որը Եվրոպայի ավտոմոբիլային խոշորագույն շուկան է: 60 ընկերություններ ֆրանսիական են: Հարցմանը մասնակցել են ընկերություններ նաև Իտալիայից, Իսպանիայից, Նիդեռլանդներից և այլ երկրներից:
Հարցվածների մեծ մասի կարծիքով՝ ամենավատթար վիճակում Իտալիայի ավտոշուկան է, որտեղ, 2012թ., Ավտոարտադրողների եվրոպական ասոցիացիայի տվյալներով, վաճառքները նվազել են 20%-ով: Ամենալավ վիճակում, հարցվածների կարծիքով, Գերմանիայի ավտոշուկան է, որտեղ վաճառքները 2012թ. նվազել են ընդամենը 3%-ով:
Ուսումնասիրության համաձայն՝ բիզնեսի վիճակից ամենից շատ գոհ են արևելաեվրոպական արտադրողները, և հարցվածների մեծ մասն այս տարածաշրջանում իրադրությունը բավական լավ է գնահատել:
Ընկերության փորձագետների կանխատեսմամբ՝ միջնաժամկետ հեռանկարում կաճեն «բյուջետային սեգմենտի», մինչև €15 հազ. արժողությամբ ավտոմեքենաների վաճառքի ծավալները։ Վաճառքների ամենացածր աճը կարձանագրեն €15-30 հազ. արժեցող ավտոմեքենաները։
Արևմտաեվրոպական արտադրողները բիզնեսի հեռանկարները նույնպես դրական են գնահատել։ Այսպես՝ հարցվածների 70%-ի կարծիքով՝ Արևմտյան Եվրոպայի ավտոշուկայում իրադրությունը կբարելավվի առաջիկա վեց ամսում: Եվրոպայում արտադրական հզորությունների կրճատում կանխատեսում են հարցմանը մասնակցած ընկերությունների 15%-ը, աշխարհում՝ 11%-ը:
Ուսումնասիրության համաձայն՝ եվրոպական ընկերությունները մտադիր են ավելացնել արտադրության արդյունավետությունը: Արտադրողները մտադիր են առավել ճկուն ժամանակացույց սահմանել, ինչպես նաև ներգրավել առավել մեծ թվով արտաքին մատակարարների։ Շուկայի մասնակիցներից ամենից արդյունավետը, ըստ նորարարությունների և արտադրանքի որակի ցուցանիշի, գերմանական, ճապոնական և հարավկորեական ընկերություններն են: