«Ի տարբերություն նախագահական ընտրությունների՝ Երևանի ավագանու ընտրություններում կեղծիքները հնարավոր կլինի կանխել: 550 տեղամաս կա, որտեղ չորս քաղաքական ուժերով կարող ենք ունենալ 220 հանձնաժողովի նախագահ և քարտուղար, ինչը հրաշալի հնարավորություն է իրավիճակը վերահսկելու համար»,- ասաց Մանուկյանը՝ հավելելով, որ քաղաքական այս նույն ուժերը համագործակցության առումով արդեն հաջողություն են գրանցել:
Նրա խոսքով` ավագանու ընտրություններում բոլոր ուժերի հիմնական խնդիրը ձայները պահելն է: Մանուկյանը կարևորեց համացանցի դերը (Facebook, Twitter, Youtube), որը ներկայում մեծ դերակատարություն ունի ընտրությունների կազմակերպման հարցում և նպաստում է տեղեկատվության արագ տարածմանը, ինչը չափազանց կարևոր է հակաիշխանական ուժերի համար:
Անդրադառնալով Հայաստանում ստեղծված իրավիճակին՝ ՀԱԿ ներկայացուցիչն ասաց, որ ամենամեծ խնդիրը շարունակում է մնալ արտագաղթը: Նա նշեց, որ ի տարբերություն պաշտոնական տեղեկությունների, որոնց համաձայն՝ 2013թ. առաջին երկու ամսվա ընթացքում Հայաստանը լքել է 25 հազ. մարդ, իրենց տեղեկություններով` այդ թիվը 50 հազ. է, ինչն էլ հենց ՀԱԿ-ին ստիպել է մասնակցել ավագանու ընտրություններին:
Մանուկյանը նաև խոսեց Ազատության հրապարակում տիրող իրավիճակի մասին և նշեց, որ հրապարակի հիմնական խնդիրն այն է, որ չկա մեսիջ, և այդ հարցն առկախված է: Նա նշեց, որ «Ժառանգության» առաջնորդ Րաֆֆի Հովհաննիսյանը «հրաժարական» բառը չի արտասանում և միայն խոսում է ինքնաբացարկի մասին, որը ինքնակամ է, իսկ հիմնական խնդիրը հենց հրաժարական տալն է:
«Հրաժարական տալը քաղաքացիական բարձր գիտակցության և բարձր մշակույթի գործ է, ինչին Սերժ Սարգսյանը չի տիրապետում»,- ասաց ՀԱԿ ներկայացուցիչը: