Ինչպես հաղորդում են նախագահի մամուլի ծառայությունից, հանդիպման մասնակիցները նախագահին իրենց տպավորություններն են ներկայացրել Երևանում ոչ պաշտոնական ձևաչափով կայացած իրենց հանդիպումների, անկաշկանդ ու բաց երկխոսության արդյունքում ձեռքբերված պայմանավորվածությունների մասին:
Նրանք ընդգծել են, որ Վիլնյուսի Արևելյան գործընկերության գագաթնաժողովից առաջ երևանյան այս քննարկումներն անչափ կարևոր ու անհրաժեշտ էին մասնակից բոլոր կողմերի համար: Օրակարգային բազմաթիվ հարցերի, այդ թվում՝ Արևելյան գործընկերության շրջանակում միմյանց հետ համագործակցությունը լավագույնս զարգացնելու հնարավորությունների շուրջ, նրանց հավաստմամբ, բավականին արդյունավետ քննարկումներ են տեղի ունեցել:
Զրուցակիցները համակարծիք են եղել, որ Արևելյան գործընկերության անդամ երկրներից յուրաքանչյուրն ունենալով իր առանձնահատկությունները, միաժամանակ բազմաթիվ ընդհանրություններ ունի անդամ մյուս երկրների հետ, որոնց վրա հաջողությամբ կարող է զարգացնել հետագա փոխգործակցությունը:
Սերժ Սարգսյանն ընդգծել է, որ Հայաստանը ցանկություն ունի մնալ Արևելյան գործընկերության երկրների շարքում և երկկողմ ու բազմակողմ ձևաչափերով շարունակել ամրապնդել հարաբերություններն այդ երկրների հետ:
Հանրապետության նախագահը հանդիպման մասնակիցների և Արևելյան գործընկերության ոչ պաշտոնական երկխոսության շրջանակում Հայաստանում գտնվող գործընթացի անդամ երկրների կրթության նախարարների հետ այնուհետև պաշտոնական ընթրիք է ունեցել նախագահական նստավայրում: