HRW-ի զեկույցում ասված է, որ Թուրքիայի իշխանությունները պետք է դադարեցնեն սիրիացի փախստականների հետմղումը սահմանից այն կողմ և հետաքննեն սահմանապահների կողմից «ուժի ոչ համաչափ կիրառման դեպքերը»:
2016թ. մարտ և ապրիլ ամիսների ընթացքում Թուրքիայի սահմանային ծառայության զինծառայողները բռնություն են կիրառել սիրիացի փախստականների դեմ՝ սպանելով հինգ մարդու, այդ թվում՝ մեկ երեխայի, լրջորեն վիրավորելով 14 հոգու:
«Թուրքիայի արտաքին գործերի նախարարությունը հայտարարում է, որ երկիրը սիրիացի փախստականների հարցում վարում է «բաց դռների» քաղաքականություն և չնայած դրան՝ նոր սահմանային պատ է կառուցում»,- ասված է իրավապաշտպան կազմակերպության զեկույցում:
«Թուրքիայի բարձրաստիճան պաշտոնյաները պնդում են, որ բաց սահմաններով և գրկաբաց ողջունում են սիրիացի փախստականներին, մինչդեռ սահմանապահները սպանում և ծեծում են նրանց,- պատմել է HRW-ի՝ փախստականների հարցով ավագ փորձագետ Գերի Սիմփսոնը: – Պատերազմից մազապուրծ, վիրավորված տղամարդկանց, կանանց և երեխաների վրա կրակելը և անկանոն ռազմական գործողությունները սարսափելի են»:
Իրավապաշտպանները նշում են, որ 2015թ. օգոստոսի կեսից Թուրքիայի սահմանապահները սկսել են հետ մղել պատերազմից փախչող սիրիացիներին:
Ստորև՝ HRW-ի տեսանյութը:
***
Թուրք սահմանապահների կողմից սիրիացի փախստականների սպանության փաստին մարտի վերջին ուշադրություն էր հրավիրել The Times բրիտանական պարբերականը:
«Թուրք սահմանապահները կրակում են փախստականների վրա, որոնք մազապուրծ՝ փախչում են Սիրիայում քաղաքացիական պատերազմից»,- գրել էր թերթը:
Պարբերականի տվյալներով՝ 16 ներգաղթյալ, այդ թվում՝ երեք երեխա, սպանվել էին վերջին չորս ամիսներին:
Ստելլա Մեհրաբեկյան