Հունվարի 12-ին՝ Գյումրիում Ավետիսյանների ընտանիքի 6 անդամների սպանության հինգերորդ տարելիցի օրը, ռուսական 102-րդ ռազմաբազայի զինծառայողները «Նվիրիր կյանք» բարեգործական ակցիայի շրջանակում արյուն են հանձնել: Այս մասին հայտնում է Ռուսաստանի Հարավային ռազմական շրջանի մամուլի ծառայությունը:
Հաղորդագրության մեջ նշվում է, որ շուրջ 500 զինծառայողներ և նրանց ընտանիքների անդամներն արյուն են հանձնել Գյումրիի արյան բանկում: Առաջին անգամ բարեգործական ակցիային մասնակցել են ՀՀ-ում ՌԴ պաշտպանության նախարարության դպրոցի բարձր դասարանների աշակերտները։ Ընդհանուր առմամբ հավաքվել է շուրջ 200 լիտր արյուն:
«Մեզ համար սա ավանդական միջոցառում է, որը պարբերաբար անցկացվում է Հայաստանի բանկիչներին աջակցելու համար», – ասել է ռուսական ռազմաբազայի հրամանատար Նիկոլայ Մարտինյուկը:
Նշվում է, որ ռազմաբազայում «Դոնորի օրեր» միջոցառումն անցկացվում է 2011 թվականից: Այս ակցիան արդեն 15-րդն է: «Ընդհանուր առմամբ յոթ տարում ակցիային ռուսաստանցի զինծառայողներից ու նրանց ընտանիքի անդամներից մասնակցնել է շուրջ հինգ հազար մարդ»,- ասված է հաղորդագրության մեջ:
***
Գյումրիում Ավետիսյանների ընտանիքի 6 անդամների սպանությունը տեղի է ունեցել 2015 թվականի հունվարի 12-ին: Նրանց մահը վրա է հասել հրազենային վնասվածքներից։ Ավետիսյանների ընտանիքից ողջ էր մնացել 6 ամսական փոքրիկը՝ Սերյոժա Արմենի Ավետիսյանը, որը կտրող-ծակող գործիքից ստացած վնասվածքներով տեղափոխվել էր բժշկական կենտրոն և յոթ օր անց մահացել:
Հանցագործությունը կատարել էր ՌԴ 102-րդ ռազմաբազայի զինծառայող Վալերի Պերմյակովը, որը Հայաստանում դատապարտվել էր ցմահ ազատազրկման:
2017 թվականին Վալերի Պերմյակովն արտահանձնվել է Ռուսաստան: ՌԴ-ի հետ ձեռք է բերվել պայմանավորվածություն հայկական կողմի ներկայացուցիչների համապատասխան հարցումների դեպքում Պերմյակովի պատժի կատարման վերաբերյալ հետագայում տեղեկատվություն տրամադրելու շուրջ:
Լուսանկարը՝ Հարավային ռազմական շրջանի մամուլի ծառայության
#ՍիվիլՆեթ #Լուրեր