Ադրբեջանը Կարմիր խաչին թույլ չի տալիս առողջական ծանր վիճակում գտնվող արցախցիներին տեղափոխել Հայաստան, ահազանգում է Արցախի մարդու իրավունքների պաշտպան Գեղամ Ստեփանյանը։
«Անցակետ տեղադրելուց հետո Ադրբեջանը բոլոր հնարավոր ձևերով խափանում է Կարմիր խաչի գործունեությունն Արցախում։ Արդեն 11 օր է՝ Կարմիր խաչի միջազգային կոմիտեն չի կարողանում առողջական ծայրահեղ վիճակում գտնվող հիվանդներին տեղափոխել Հայաստանի բուժհաստատություններ»,- Թվիթերի իր էջում գրել է Ստեփանյանը։
After setting up a checkpoint, #Azerbaijan obstructs the activities of the Red Cross in Artsakh in every possible way. For 11 days now, the ICRC has been unable to transport patients in critical health conditions to medical facilities in Armenia. pic.twitter.com/bhTVZKFBKV
— Gegham Stepanyan #StopArtsakhBlockade (@Gegham_Artsakh) May 10, 2023
Ապրիլի 23-ին Ադրբեջանը Լաչինի միջանցքում՝ Հայաստանի սահմանին մոտ և ռուս խաղաղապահների վերահսկողության գոտում՝ Հակարի գետի կամրջին կից, հսկիչ-անցագրային կետ է տեղադրել։
Արցախի առողջապահության նախարարությունը հայտնում է, որ Արցախից բուժառուների տեղափոխումը դադարել է ապրիլի 29-ից։ Նախարարության տվյալներով՝ 30 հիվանդ սպասում է շտապ տեղափոխման։
«Պատճառը ադրբեջանական կողմից հարուցված հերթական խոչընդոտն է, քանի որ Շուշիի մոտ ճանապարհի արգելափակված հատվածում Ադրբեջանի ուժային մարմինների ներկայացուցիչները պահանջել են Կարմիր Խաչի վարորդների ու տեղափոխվող բուժառուների անձնագրային և մեքենաների ստուգումներ իրականացնել, ինչը նախկինում չէր իրականացվում և հակասում է միջազգային մարդասիրական իրավունքի նորմերին: Հիվանդների տեղափոխում չի իրականացվում, գնալով այդ խնդիրը հրատապ է դառնում»,- ասված է հաղորդագրությունում։
Կասեցվել է նաև Կարմիր Խաչի միջոցով դեղորայքի մատակարարումը, որի պատճառով Արցախում կրկին դադարեցվել են պլանային վիրահատությունները, որոնք մասնակիորեն վերականգնվել էին շաբաթներ առաջ: