Սերժ Սարգսյանը հոկտեմբերի 9-ին աշխատանքային այցով կմեկնի Միացյալ Նահանգներ: Բաղրամյան 26-ը տեղեկացնում է, որ Սարգսյանը Նյու Յորքում կմասնկացի հոկտեմբերի 10-ին մեկնարկող «Հայաստան» ներդրումային համաժողովին: Այցի շրջանակներում նախատեսված են նաև նախագահի երկկողմ հանդիպումներ:
Նախագահի պաշտոնը ստանալուց՝ 2008թ․ ապրիլից ի վեր, Սերժ Սարգսյանը յոթ անգամ այցելել է Միացյալ Նահանգներ, սակայն նրան չի հաջողվել ընդունելության արժանանալ Սպիտակ տանը: Սարգսյանին հաջողվել երկու կարճ հանդիպում ունենալ Բարաք Օբամայի հետ: Միայն այդքանը, թեև Հայաստանի արտգործնախարարությունը և Վաշինգտոնում Հայաստանի դեսպանները ջանք ու եռանդ չեն խնայել՝ կազմակերպելու Սարգսյանի պաշտոնական այցը:
Ձեզ ենք ներկայացնում Սերժ Սարգսյանի՝ Միացյալ Նահանգներ այցելությունների ժամանակագրությունը:
2009թ․ հոկտեմբերին Սարգսյանը համահայկական շրջագայություն կատարեց հայ-թուրքական արձանագրությունները Սփյուռքում «վաճառելու» նպատակով: Այն ընգդրկեց նաև Նյու Յորքն ու Լոս Անջելեսը: Ամերիկյան վարչակարգը ողջունեց Հայաստան-Թուրքիա հարաբերություններում Սարգսյանի «խիզախ» քայլը: Այցի ընթացքում Օբաման զանգահարեց Սերժ Սարգսյանին և իր աջակցությունը հայտնեց:
2010թ․ ապրիլին Սարգսյանը առաջին հանդիպումը ունեցավ Օբամայի հետ: Այդ հանդիպումը կայացավ Վաշինգտոնի միջուկային անվտանգության հարցերով գագաթաժողովի շրջանակներում:
2011թ․ Սարգսյանը երկու անգամ այցելեց Միացյալ Նահանգներ՝ մայիսին և սեպտեմբերին: Սեպտեմբերյան այցի ընթացքում՝ Նյու Յորքում և Լոս Անջելեսում, նա հանդիպումներ ունեցավ հայ համայնքի ներկայացուցիչների հետ, իսկ մայիսին Վաշինգտոնում նրան ընդունեց պետքարտուղարը:
2015թ․ Սերժ Սարգսյանը երկու անգամ աշխատանքային այցով մեկնեց Միացյալ Նահանգներ, սակայն երկու դեպքում էլ դա առնչություն չուներ հայ-ամերիկյան հարաբերությունների հետ, թեև եղան նաև երկկողմ հանդիպումներ և առնվազն մեկ պատմական լուսանկար՝ Բարաք Օբամայի և նրա տիկնոջ հետ:
Մայիսին Սարգսյանը Վաշինգտոնի ազգային տաճարում մասնակցեց Հայոց ցեղասպանությանը նվիրված միջկրոնական աղոթքին: Արարողությանը մասնակցեցին նաև փոխնախագահ Ջոզեֆ Բայդենը և ՄԱԿ-ում Միացյալ Նահանգների դեսպան Սամանթա Փաուերը: Այցի ընթացքում Սարգսյանը հանդիպումներ ունեցավ Սենատի հանրապետական մեծամասնության ղեկավար Միտչ Մըքոնելի և դեմոկրատական փոքրամասնության ղեկավար Հարրի Ռիդի հետ, ԱՄՆ Կոնգրեսի գրադարանի տնօրեն Ջեյմս Բիլինգթոնի հետ:
Սարգսյանը Միացյալ Նահանգներ մեկնեց նաև սեպտեմբերին՝ ՄԱԿ-ի Գլխավոր վեհաժողովում ելույթ ունենալու նպատակով: Նյու Յորքում նա մասնակցեց նախագահ Բարաք Օբամայի անունից` ի պատիվ ՄԱԿ-ի Գլխավոր վեհաժողովի 70-րդ նստաշրջանին մասնակցող երկրների պատվիրակությունների ղեկավարների տրված ընդունելությանը: Ընդունելության ընթացքում, ինչպես հաղորդեց Բաղրամյան 26-ը, նախագահներ Բարաք Օբաման և Սերժ Սարգսյանը «կարճ զրույց են ունեցել, որի ժամանակ քննարկել են համահայկական նշանակության հարցեր»:
2016թ․ մարտի վերջին Սերժ Սարգսյանը հերթական աշխատանքային այցը կատարեց ԱՄՆ: Մասաչուսեթս նահանգում Սարգսյանը այցելեց հայաշատ Ուոթերթաուն քաղաք, որտեղ նախ հյուրընկալվել է Ամերիկայի հայկական գրադարան-թանգարանում, ապա Ռամկավար ազատական կուսակցության «Պայքար» և Հայ Յեղափոխական Դաշնակցության «Հայրենիք» կենտրոններում: Սարգսյանը Միացյալ Նահանգներ այցի առաջին օրը եղել էր նաև Բոստոնի Սուրբ Ստեփանոս և Սուրբ Երրորդություն հայկական եկեղեցիներում:
Սերժ Սարգսյանը դեռ չէր վերադարձել Միացյալ Նահանգներից, երբ Ադրբեջանը հարձակվեց Արցախի վրա (Ապրիլյան 4-օրյա պատերազմը):
Լևոն Տեր-Պետրոսյանը նախագահի պաշտոնում առաջին այցը տվել է հենց Միացյալ Նահանգներ: Դա տեղի ունեցավ նրա երդմնակալությունից երեք օր անց՝1991թ․ նոյեմբերի 14-ին: Տեր-Պետրոսյանին Սպիտակ տանը ընդունեց Ջորջ Բուշ Ավագը:
Տեր-Պետրոսյանի՝ Նահանգներ երկրորդ պաշտոնական այցը տեղի ունեցավ 1994թ․ օգոստոսին: Սպիտակ տան օվալաձև դահլիճում նրան ընդունեց Բիլ Քլինթոնը:
Երկրորդ նախագահ Ռոբերտ Քոչարյանը նույնպես երկու անգամ է ընդունելության արժանացել Սպիտակ տանը. առաջինը 1999թ․ ապրիլին, երկրորդը՝ 2001թ․ ապրիլին՝ Քի Վեսթից Հայաստան վերադարձի ճանապարհին:
