Ազգային ժողովի «Ծառուկյան» խմբակցությունը կողմ կքվեարկի ՀՀ նախագահի պաշտոնում Արմեն Սարգսյանի թեկնածությանը, հաղորդում է «Արմենպրեսը»՝ հղում անելով «Կենտրոն» հեռուստաընկերության լրատվական թողարկմանը։
Որոշման մասին Ազգային ժողովի «Ծառուկյան» խմբակցության պատգամավորների հետ հանդիպմանը հայտարարել է «Ծառուկյան» դաշինքի առաջնորդ Գագիկ Ծառուկյանը:
«Ճանաչում եմ Արմեն Սարգսյանին, գիտեմ նրա մոտեցումները, նրա տեսակետները, նրա պատրաստակամությունը: Նա հանդիպել է քաղաքական ուժերի հետ, կրթական, մշակութային, հասարակական շրջանակների հետ և բոլորին ներկայացրել է, որ պետք է դադարեցնի արտագաղթը, ներգաղթ սկսի, ներդրումներ բերի: Նա ասում է այն, ինչը մեր ցանկությունն է, մեր նպատակն է»,- ասել է Ծառուկյանը՝ հավելելով, որ պետք է հնարավորություն տալ Արմեն Սարգսյանին:
Իշխող Հանրապետական կուսակցությունը ՀՀ նախագահի պաշտոնում առաջադրել է Մեծ Բրիտանիայում Հայաստանի դեսպան Արմեն Սարգսյանի թեկնածությունը։
Սարգսյանի թեկնածությունն արդեն սատարել է նաև ՀՅԴ-ն՝ ՀՀԿ-ի կոալիցիոն գործընկերը։
Ազգային ժողովի կողմից առաջին փուլով ընտրվելու համար Արմեն Սարգսյանին հարկավոր է ձայների 2/3-ը, ներկայում՝ 79 ձայն։ ՀՀԿ-ն, ՀՅԴ-ն և «Ծառուկյան» դաշինքը խորհրդարանում ունեն համապատասխանաբար 58, 7 և 31 տեղ։
