La Repubblica իտալական թերթը վերջերս հոդված էր հրապարակվել այն մասին, որ մահից մեկ օր առաջ հոլիվուդյան լեգենդ Մերլին Մոնրոն դուրս էր գրել ոչ շատ թանկ պահարան գնելու չեկ:
Լոս Անջելեսի Pilgrim կահույքի խանութում 228,80 դոլարով պահարանի գնման չեկի վրա նշված ժամկետը 1962թ․ օգոստոսի 4-ն է, այսինքն՝ դերասանուհու ողբերգական մահվան նախօրեն:
Ամերիկացի հայտնի հոգեբան Դևիդ Բեռնշտեյնի խոսքով՝ ինքնասպանության մտադրություն ունեցող մարդիկ շատ հաճախ մեծ գումարներ են ծախսում, քանի որ գնումներ կատարելը նրանց առանձնակի հաճույք է պատճառում:
Հենց այդ փաստն էլ գրավել է Մոնրոյի մահվան պատճառները վերլուծող հոգեբանների ուշադրությունը. դերասանուհին ձեռք է բերել ընդամենը մեկ բան, այն էլ՝ առօրյայում օգտագործվող առարկա, ինչը վկայում է այն մասին, որ նա պատրաստվում էր դեռ երկար «քայլել երկրի երեսին»: «Եթե մենք հոգեբանական աուտոպսիա անցկացնենք, ապա այս չեկը ամենաուշագրավ գտածոն է: Այն ստիպում է մտածել, որ Մոնրոն մահանալու մտադրություն չուներ»,- նշել է հոդվածի հեղինակը:
«Այդ ողբերգական գիշերը պետք է կայանար Մոնրոյի և Ռոբերտ Քենեդու հանդիպումը: Վերջինս, սակայն, չէր եկել, ինչի պատճառով դերասանուհին խոր սթրես էր ապրել: Այսպիսով՝ գաղտնիքը մնում է չբացահայտված. դեղերի չարաշահումը դժբախտ պատահա՞ր էր, թե՞ կամավոր քայլ», – գրել է La Repubblica-ն:
Նշենք, որ վերոնշյալ չեկը վաճառքի է հանվել Բեվեռլի Հիլզում: Բացի այդ՝ աճուրդի է հանվել դերասանուհու կյանքին ու գործունեությանը առնչվող ևս 15 լոտ: