Մենք միշտ փորձում ենք չնկատել մեր սխալները, դարեր շարունակ մեր պրոբլեմները բարդել ենք մեր հարևանների վրա. նշեց ԱԺ «Ժառանգություն» խմբակցության պատգամավոր, ՀՀ նախկին ԱԳ նախարար Ալեքսանդր Արզումանյանը: Ըստ նրա՝ որևէ մեկը չի փոխելու մեր աշխարհաքաղաքական դիրքը, և ժամանակն է վարժվել ապրել այստեղ՝ այս հարևանների հետ, անցյալի սխալներից դասեր քաղելով:
Արզումանյանի խոսքով՝ մենք մեր էներգետիկ համակարգի շուրջ 80 տոկոսը նվիրել ենք Ռուսաստանին, և հիմա նա էլ օգտագործում է այդ գործոնը: «Ռուսաստանը իր սահմանի վրա իր գազը վաճառում է իր իսկ ընկերությանը, որը վրան գին ավելացնելով՝ վաճառելու է մեր քաղաքացիներին …Ժամանակն է վերանայել այդ պայմանագիրը: Ինչպե՞ս կարելի է ունենալ էներգետիկայի նախարարություն, որ տիրապետում է միայն 20 տոկոսին»,- նշեց նա:
Գազի գնաճը, ըստ նրա, լիովին նորմալ է, քանի որ հասկանալի էր, որ ինչ-որ պահից Ռուսաստանը մեզ գազը վաճառելու նույն գնով, ինչ՝ այլ երկրների, ուղղակի «դրան պետք էր պատշաճ պատրաստվել»: «Մեզանում դեռ կան մարդիկ, որ ճորտի հրճվանքով են խոսում Ռուսաստանի մասին. դա վտանգավոր մոտեցում է և անարգանք է մեզ»,- ասաց նա:
Անդրադառնալով վերջին զարգացումներին՝ գազի գնաճը, Լավրովի՝ Արցախի վերաբերյալ «ադրբեջանական տարածքներ» խոսքը, ՀԱՊԿ-ին նախագահի մակարդակով չմասնակցելը՝ Արզումանյանն ասաց, որ սա «հստակ միտում է Հայաստանին՝ դեպի Մաքսային միություն քաշելու»: «Լավրովին ճանաչելով որպես դիվանագետ՝ ես գիտեմ, որ նա լեզվի սայթաքումներ թույլ չի տալիս: Իսկ նախագահի՝ ՀԱՊԿ-ի առանց փողկապների հանդիպմանը չմասնակցելը նորմալ է, ճիշտ որոշում է: Գուցե նկատվի՝ որպես դեմարշ, սակայն Ռուսաստանն է անընդհատ դեմարշներ անում: Գուցե և պահը գա, որ Ռուսաստանը նույնիսկ մոռանա, որ Հայաստանն իր ռազմավարական գործընկերն է ու շատ լավ ընկերություն անի Ադրբեջանի հետ: Հայաստանի այս վիճակն անընդունելի է. երբ նա թելից է կախված, իսկ մկրատը Ռուսաստանի ձեռքում է»,- ասաց նա՝ հավելելով, որ այնքան հստակ է Ռուսաստանի քաղաքականությունը, որ արդեն մեր «եվրոպական գործընկերներն են հուշում Ռուսաստանին, որ այդ Մաքսային միությունը հակասում է Խորը և համապարփակ ազատ առևտրի պայմանագրին»:
Ըստ Արզումանյանի՝ ռուսական ռազմաբազան մեր երկրում ոչ թե Հայաստանի սահմաններն է պաշտպանում, այլ իրացնում է իր շահերը: «Եվ Ռուսաստանը պիտի խնդրի, որ մենք այս բարիդրացիական հարաբերությունները պահպանենք»,- ասաց նա:
