ԱՄՆ-ն ու Եվրամիությունը ողջունել են Ադրբեջանից հինգ հայ գերիների վերադարձը Հայաստան, որը տեղի ունեցավ սեպտեմբերի 8-ի երեկոյան:
Միացյալ Նահանգների Պետդեպարտամենտի խոսնակ Նեդ Փրայսը ողջունել է «հայ ձերբակալվածների հայրենիք վերադարձի մասին հաղորդումը», որը, նրա կարծիքով «դրական զարգացում է Հայաստանի և Ադրբեջանի խաղաղ գործընթացի համար»։
«Հուսով ենք, որ մնացած բոլոր ձերբակալվածները շուտով կվերադառնան տուն, և Ադրբեջանն ու Հայաստանը կշարունակեն քայլեր ձեռնարկել վստահություն ձևավորելու և առկա տարաձայնությունները լուծելու համար», – Թվիթերում գրել է ԱՄՆ Պետդեպարտամենտի խոսնակ Նեդ Փրայսը:
We welcome reports of Armenian detainees returned home, a positive development for Armenia and Azerbaijan peace process. We hope all remaining detainees return home soon and Azerbaijan and Armenia continue taking steps to build trust and resolve outstanding differences.
— Ned Price (@StateDeptSpox) September 9, 2022
Հինգ հայ ռազմագերիների վերադարձը ողջունել է նաև Հարավային Կովկասի և Վրաստանում ճգնաժամի հարցերով Եվրամիության հատուկ ներկայացուցիչ Տոյվո Կլաարը` հիշեցնելով, որ դա տեղի է ունեցել օգոստոսի 31-ին Բրյուսելում կայացած Հայաստանի և Ադրբեջանի ղեկավարների հանդիպումից հետո:
«Կարևոր մարդասիրական ժեստ է և հատկանշական է նաև, որ հանձնումը տեղի է ունեցել առանց միջնորդների»,- Թվիթերում գրել է Կլաարը:
Welcome news today regarding the release of five Armenian detainees by Azerbaijan following the meeting of the leaders in Brussels on 31/8.
Important humanitarian gesture & likewise noteworthy that the handover took place without intermediaries. pic.twitter.com/HU3RrRQrKe— Toivo Klaar (@ToivoKlaar) September 8, 2022
ՀՀ Ազգային անվտանգության ծառայությունը սեպտեմբերի 8-ին հայտնեց, որ ադրբեջանական կողմը Հայաստանին վերադարձրել է հինգ հայ ռազմագերիների։
Հայ գերիների խմբի վերջին վերադարձը տեղի էր ունեցել կես տարի առաջ՝ 2022-ի փետրվարի 7-ին։
ՀՀ կառավարության փետրվարի 28-ի զեկույցում բերվում են գերիների վերաբերյալ թվեր․ «2021 թվականի ընթացքում ՌԴ-ի, ԱՄՆ-ի, Վրաստանի, Հունգարիայի, ԵՄ-ի, Ֆրանսիայի միջնորդությամբ հայրենիք են վերադարձվել Ադրբեջանի կողմից գերեվարված 84 անձ. 44-օրյա պատերազմից ի վեր վերադարձվել է 150 գերեվարված անձ: Սույն զեկույցի ներկայացման պահին ադրբեջանական գերության մեջ են մնում 38 անձինք: Անհայտ է 217 անձի գտնվելու վայրը»։
Ըստ այդմ՝ այս պահին Ադրբեջանից Հայաստան է վերադարձել 155 գերի։
Իրավապաշտպան, ՄԻԵԴ-ում գերիների հարցով ՀՀ ներկայացուցիչ Սիրանուշ Սահակյանը մայիսին հայտնել էր, որ Ադրբեջանում գտնվող հայ գերիների իրական թիվը 119–ն է։
