Հունվարի 28-ին Իրանի Սպահան քաղաքում ռազմարդյունաբերական գործարանի վրա անօդաչու թռչող սարքերով հարձակման հետևում հնարավոր է՝ Իսրայելն է կանգնած․ հայտնում է Reuters գործակալությունը՝ վկայակոչելով ամերիկացի պաշտոնյաների։ Ավելի վաղ նման տեղեկություն էր տարածել Wall Street Journal-ը։ Ըստ պարբերականի՝ իրանական ռազմական օբյեկտը թիրախավորվել է, քանի որ ԱՄՆ-ն ու Իսրայելը նոր ուղիներ են որոնում՝ «զսպելու Թեհրանի միջուկային ու ռազմական հավակնությունները»։
Հարձակման մասին իր հաղորդագրությունում Իրանի պաշտպանության նախարարությունը հայտնել էր, որ որսացել է անօդաչու սարքերը․ զոհեր և վիրավորներ չկան, լուրջ վնաս չի պատճառվել։ Թեհրանը պաշտոնապես որևէ կողմի չի մեղադրել հարձակման համար, արտաքին գործերի նախարար Հոսեյն Ամիրաբդոլահյանը հայտարարել է «երկչոտ հարվածի» մասին, որը միտված է Իրանում «անպաշտպանության մթնոլորտի ստեղծմանը»։
Իսրայելի պաշտպանության նախարարությունից մեկնաբանություն չեն տվել։ Իսկ Պենտագոնի խոսնակ Պատրիկ Ռայդերը հայտարարել է, որ Սպահանի հարձակումներում ամերիկյան ռազմական ուժեր ներգրավված չեն եղել։ Ըստ Reuters-ի՝ ամերիկացի պաշտոնյաները մատնացույց են անում Իսրայելին։
Սպահան քաղաքում ռազմարդյունաբերական գործարանի վրա հարձակումը տեղի է ունեցել Իրանի ու Արևմուտքի միջև լարվածության պայմաններում, որը արևմտյան լրատվամիջոցներն անվանում են «ստվերային պատերազմ»։
Իսրայելական Haaretz-ը մեջբերում է Մոսադի ղեկավար Դևիդ Բարնեային, որը 2022-ի սեպտեմբերին իր ելույթներից մեկում Սպահանը նշել էր որպես գործողության հնարավոր թիրախ։
