ՄԱԿ-ի Անվտանգության խորհրդում օգոստոսի 16-ին տեղի ունեցած քննարկման հիմնական արդյունքն այն է, որ միջազգային ատյանում ընդգծվեց միջանցքի փակ լինելը։ Կառավարության օգոստոսի 17-ի նիստում հայտարարեց վարչապետ Նիկոլ Փաշինյանը։
«Միգուցե տարօրինակ թվա, որ սա արձանագրում եմ որպես քննարկան արդյունք, բայց Ադրբեջանն անընդհատ ու շարունակաբար պնդում է, թե միջանցքը փակ չէ»,- ասաց Փաշինյանը։
Նրա խոսքով՝ երկրորդ արդյունքն այն է, որ ՄԱԿ-ի ԱԽ նիստը հաստատեց հումանիտար ճգնաժամի առկայությունն ու այն, որ 120 000 մարդու կյանքն ու անվտանգությունը դրված են կասկածի տակ։ Փաշինյանը նաև շեշտում է՝ նիստում ընդգծվեց, որ ՄԱԿ-ի Արդարադատության միջազգային դատարանի՝ Լաչինի միջանցքով անձանց, տրանսպորտային միջոցների ու բեռների անարգել, երկկողմանի շարժի ապահովման վերաբերյալ որոշումը Ադրբեջանի կողմից չի կատարվել։
«Ճշմարտությունը Լաչինի միջանցի ապօրինի արգելափակման վերաբերյալ բարձրաձայնված է ու ԱԽ-ում հավաքական կոչ է հնչել վերացնել Լաչինի միջանցքի արգելափակումը։ Իհարկե, այս կոչը իրագործված չէ ու 400 տոննա հումանիտար բեռը սպասում է Լեռնային Ղարաբաղ մուտքի հնարավորությանը»,- ասաց նա։
Փաշինյանը նկատեց՝ Ադրբեջանը մի կողմից արգելափակել է 100 տոննա ալյուրի մուտքը ԼՂ, մյուս կողմից թույլ չի տալիս, որ ղարաբաղցիները իրենց ցանած հացահատիկը հավաքեն՝ ալյուր ունենալու համար․ «Սա փաստ է, որ հիմնավորում է հետևյալ թեզը՝ Ադրբեջանը ԼՂ-ի հայությանը սովահարության միջոցով ցեղասպանության է ենթարկում»,- հայտարարեց Փաշինյանը։
***
2022-ի դեկտեմբերի 12-ին Ադրբեջանը բնապահպանական կեղծ պատճառաբանությամբ փակել է Արցախը Հայաստանին կապող միակ ճանապարհը։ 2023-ի ապրիլի 23-ին Ադրբեջանը Լաչինի միջանցքում՝ Հակարի գետի կամրջին կից, հսկիչ-անցագրային կետ է տեղադրել։
Հունիսի 15-ին Ադրբեջանի սահմանապահները Հակարիի կամրջի ուղղությամբ առաջխաղացման փորձ են կատարել՝ ՀՀ տարածքում դրոշ տեղադրելու նպատակով: Հայկական կողմի ձեռնարկած միջոցների արդյունքում փորձը կանխվել է: Հակարիի կամրջի մոտ տեղի ունեցած ադրբեջանական սադրանքից հետո Լաչինի միջանցքով բոլոր հումանիտար ուղևորափոխադրումներն ու բեռնափոխադրումները արգելվել են Ադրբեջանի կողմից։
Հուլիսի 26-ին Հայաստանի կառավարությունը հայտարարեց, որ հումանիտար օգնություն է ուղարկում Արցախ։ Նախապես հայտարարվել էր, որ հայկական կողմը բեռը կհասցնի Կոռնիձոր, որտեղից ռուս խաղաղապահներն այն կտեղափոխեն Արցախ։ Օգնությունը տեղափոխող բեռնատար մեքենաները դեռ կանգնած են հայկական անցակետի մոտ։
Օգոստոսի 16-ին Հայաստանի պահանջով կայացել է ՄԱԿ-ի Անվտանգության խորհրդի նիստ՝ Լեռնային Ղարաբաղի բնակչությանը հարկադրված լիակատար շրջափակման հետևանքով հումանիտար իրավիճակի վատթարացման առնչությամբ։
