Civilnet
Վարչապետ Տիգրան Սարգսյանը փետրվարի 18-ին ընդունել է «Ռասիա ՖԶԷ» ներդրումային ընկերության նախագահ Ջոզեֆ Բորկովսկիի գլխավորած պատվիրակությանը:
Ինչպես հաղորդում են կառավարության մամուլի ծառայությունից, հանդիպմանը վարչապետին է ներկայացվել «Հայաստանի հարավային երկաթուղու» (Իրան-Հայաստան երկաթուղու) կառուցման նախագիծը, վերջինիս տնտեսական ու տեխնիկական հիմնավորումը:
Երկաթգծի երկարությունը կկազմի շուրջ 300 կմ, այն բաղկացած կլինի կամուրջներից և 60 թունելներից, կունենա 27 կայարան:
Երկաթգծի կառուցումը նախնական գնահատվում է $3,2 մլրդ: Ակնկալվում է, որ շինարարությունը կտևի մինչև 6 տարի: Ըստ ներկայացված ծրագրի՝ շինաշխատանքները կարող են մեկնարկել 2016-ին և ավարտվել 2022-ին:
«Անհրաժեշտ է մշակել աշխատանքների իրականացման «ճանապարհային քարտեզ», որպեսզի նախագիծը դառնա իրականություն»,- ասել է Տիգրան Սարգսյանը:
Երկաթգծի նախագիծը մշակվել է Չինաստանի հաղորդակցության և շինարարության միջազգային ընկերության (CCCC International) կողմից, որն այս բնագավառում ունի երկարատև փորձ և մեծ ճանաչում:
«Ռասիա ՖԶԷ» ներդրումային ընկերությունն աշխատանքներ է իրականացնում ներդրումների ներգրավման ուղղությամբ: Նշվել է, որ չինական բանկերը հետաքրքություն են ցուցաբերել նախագծի նկատմամբ և պատրաստակամություն հայտնել ֆինանսավորել ծրագրի 60%-ը:
ՍիվիլՆեթն ավել վաղ գրել էր, որ այս նախագծով, ըստ էության, մեկնարկ է տրվում տարիներ շարունակ քննարկվող «Հայաստան-Իրան» երկաթուղու նախագծի իրականացմանը։ Երկաթուղին Հայաստանի տարածքով, նախնական գնահատականներով, պետք է անցնի Մեղրի-Սիսիան-Ջերմուկ-Մարտունի-Գավառ-Գագարին ուղղությամբ: Երկարությունը կազմելու է 313 կմ։
Ի դեպ` Հայաստան-Իրան երկաթուղին, ըստ էության, պետք է գտնվեր կառուցման ավարտման փուլում: Դեռևս 2010-ի ապրիլին Երեւանում Հայաստանի կապի եւ տրանսպորտի նախարարը ու Իրանի ճանապարհների եւ հաղորդակցության նախարարը ստորագրել էին Հայաստան-Իրան երկաթուղու նախագծի իրականացման համագործակցության հուշագիր:
Պատմություններ
