Հունիսի 7-ի երեկոյան ընդդիմադիիր զինված խմբավորումների կողմից Հալեպի հայաբնակ Նոր Գյուղ և Սուլեյմանիե թաղամասերում նետված ականների և հրթիռների հետևանքով զոհվել է ազգությամբ հայ, 1982թ. ծնված Կարո Աստուրյանը: Այս մասին հաղորդում է Հալեպի «Գանձասար» շաբաթեթրի ֆեյսբուքյան էջը:
Սուլեյմանիե թաղամասում ընկած արկերի հետևանքով վիրավորվել են Հակոբ Սեմերճյանն ու Պայծիկ Մելքոնյան-Չերչյանը: Վերջինիս վիճակը մտահոգիչ չէ:
Սիրիան 2011թ․մարտից ներքաղաքական ճգնաժամում է։ Երկրի ընդդիմությունը պահանջում է Սիրիայի նախագահ Բաշար ալ Ասադի պաշտոնաթողությունը՝ կառավարական ուժերին մեղադրելով խաղաղ բնակչության նկատմամբ զանգվածային բռնությունների իրագործման մեջ։ Պաշտոնական Դամասկոսը վստահեցնում է, որ ժողովրդավարական կարգախոսների քողի ներքո երկրում գործում են «զինված ահաբեկչական խմբավորումներ»։ Համաձայն ՄԱԿ-ի տվյալների՝ հակամարտության սկզբից ի վեր Սիրիայում զոհվել է ավելի քան 150 հազ․ մարդ, փախստական է 2,8 մլն սիրիացի, ևս 6,5 մլն սիրիացի համարվում է ներքին տեղահանված։
