Մայիսի 3-ին Լեռնային Ղարաբաղում անցկացվում են խորհրդարանական ընտրություններ:
33 հոգանոց խորհրդարանի 22-ը տեղը համամասնական է, 11-ը մեծամասնական: 1991թ. անկախությունից հետո սրանք Լեռնային Ղարաբաղում անցկացվող խորհրդարանական վեցերորդ ընտրություններն են:
Ընտրություններին մասնակցում է յոթ կուսակցություն:
«Ազատ հայրենիք» կուսակցության համամասնական ցուցակը գլխավորում է կուսակցության ղեկավար, ԼՂՀ վարչապետ Արայիկ Հարությունյանը:
Արցախի ժողովրդավարական կուսակցության համամասնական ցուցակը գլխավորում է կուսակցության ղեկավար, Ազգային ժողովի նախագահ Աշոտ Ղուլյանը:
ՀՅԴ ցուցակը գլխավորում է ԼՂՀ փոխվարչապետ Արթուր Աղաբեկյանը:
«Շարժում 88» կուսակցության համամասնական ցուցակը գլխավորում է ԼՂՀ պաշտպանության նախարարի նախկին տեղակալ, 2012թ. նախագահական ընտրությունների թեկնածու Վիտալի Բալասանյանը: Կուսակցության նախագահ Էդուարդ Աղաբեկյանը համամասնական ցուցակի երկրորդ համարն է:
«Ազգային վերածնունդ» կուսակցության համամասնական ցուցակը գլխավորում է կուսակցության ղեկավար Հայկ Խանումյանը:
Լեռնային Ղարաբաղի կումունիստական կուսակցության ցուցակը ղեկավարում է Հրանտ Մելքումյանը: Կոմունիստներին աջակցություն է ցուցաբերում ԼՂՀ պաշտպանության բանակի գեներալ Վյաչեսլավ Հյուսնունցը, որը ցուցակի երկրորդ համարն է:
«Խաղաղություն և զարգացում» կուսակցության ցուցակը գլխավորում է կուսակցության նախագահ Գարիկ Գրիգորյանը: Կուսակցությունը ստեղծվել է 2014թ. նոյեմբերին և գրանցվել 2015թ. հունվարին:
Ընտրությունների դիտարկման համար Լեռնային Ղարաբաղ են ժամանել միջազգային դիտորդներ Ֆրանսիայից, Իսրայելից, Հունգարիայից, Չեխիայից, Բելգիայից, Էստոնիայից, Մեքսիկայից, Գերմանիայից, Ռուսաստանից, Զիմբաբվեից, Հարավային Օսիայից և Հայաստանից: Ֆրանսիացի դիտորդների խումբը ղեկավարում է Ֆրանսիա-Արցախ բարեկամական խմբի ղեկավար, Ֆրանսիայի ԱԺ պատգամավոր Ֆրանսուա Ռոշբլուանը:
Ապրիլի 30-ին ԵԱՀԿ Մինսկի խմբի համանախագահները հանդես են եկել հայտարարությամբ, նշել, որ «չեն ընդունում «ընտրությունների» արդյունքները՝ որպես Լեռնային Ղարաբաղի իրավական կարգավիճակի վրա ազդող գործոն, և շեշտում, որ դրանք որևէ կերպ չեն կանխորոշում Լեռնային Ղարաբաղի վերջնական կարգավիճակը կամ ղարաբաղյան հակամարտության տևական և խաղաղ կարգավորմանը միտված շարունակական խաղաղ բանակցությունների արդյունքները»:
