Արգենտինահայ գործարար Էդուարդո Էռնեկյանը վարչապետ Կարեն Կարապետյանի հետ քննարկել է Արմավիրի մարզում արևային էլեկտրակայանի, Մեղրիի հիդրոէլեկտրակայանի կառուցման, Երևանի «Զվարթնոց» և Գյումրիի «Շիրակ» օդանավակայանների ենթակառուցվածքների զարգացման և զբոսաշրջության խթանման, Արտաքին գործերի նախարարության նախկին շենքի ներդրումային ծրագրերին վերաբերող հարցեր։
Կառավարության կայքէջի փոխանցմամբ՝ այսօր վարչապետ Կարեն Կարապետյանի հետ հանդիպմանը արգենտինահայ գործարար, բարերար Էդուարդո Էռնեկյանը քննարկել է իր ներդրումային ծրագրերը Հայաստանում։
Զրուցակիցները, մասնավորապես, քննարկել են Արմավիրի մարզում արևային էլեկտրակայանի, Մեղրիի հիդրոէլեկտրակայանի կառուցման, Երևանի «Զվարթնոց» և Գյումրիի «Շիրակ» օդանավակայանների ենթակառուցվածքների զարգացման և զբոսաշրջության խթանման, Արտաքին գործերի նախարարության նախկին շենքի ներդրումային ծրագրերին վերաբերող հարցեր։ Վարչապետը ներկայացրել է Հայաստանի և տնտեսության զարգացման ուղղությամբ ձեռնարկվող քայլերն ու նաև տեղեկացրել, որ կառավարությունն ստեղծում է Ռազմավարական նախաձեռնությունների կենտրոն, որը ծառայելու է որպես հարթակ պետություն-մասնավոր հատված համագործակցության ներքո համատեղ ծրագրերի կյանքի կոչման համար: Կարեն Կարապետյանը նշել է, որ կառավարությունը կարևորում է ներդրողների, գործարարների հետ մշտական հետադարձ կապն ու բաց է փոխադարձ հետաքրքրություն ներկայացնող հարցերը քննարկելու և հարմարավետ բիզնես միջավայր ձևավորելու համար:
Ողջունելով կառավարության նախաձեռնած բարեփոխումները՝ պարոն Էռնեկյանը նշել է, որ շարունակելու է Հայաստանում ներդրումային ծրագրերի իրականացումը, և միաժամանակ պատրաստակամություն հայտնել իր ներկայացուցչի միջոցով ներգրավվել Ռազմավարական նախաձեռնությունների կենտրոնի աշխատանքներում:
Գործարար Էդուարդո Էռնեկյանը Հայաստանի խոշորագույն ներդրողներից։ Նա տնօրինում է Երևանի Զվարթնոց և Գյումրիի Շիրակ օդանավակայանները։ Էռնեկյանը հիմնադրել է Կարաս գինիների գործարանը։ Նա Կոնվերս բանկի խոշոր բաժնետերն է։
Էդուարդո Էռնենկյանը նաև մի շարք բարեգործական ծրագրեր է իրականացրել Հայաստանում և Արցախում։
