Ստեղծվել է Աշխատանքային օրենսգրքում փոփոխություններ կատարելու հատուկ նախագիծ. այս մասին այսօր լրագրողների հետ հանդիպման ժամանակ նշեց ՀՀ աշխատանքի և սոցիալական հարցերի նախարարության աշխատանքի և զբաղվածության վարչության պետ Ժորա Սարգսյանը: Ասուլիսի ընթացքում վերջինիս հնչեցրած հիմնական դրույթները՝ ստորև։
Աշխատանքային օրենսգրքի 186-րդ հոդվածի 1-ին մասի համաձայն՝ գործատուն իրավունք ունի պարապուրդի ժամանակահատվածում աշխատողին տեղափոխելու այլ աշխատանքի, որը համապատասխանում է իր մասնագիտությանը, սակայն բնականաբար միշտ չէ, որ գործատուն այդ հնարավորությունը ունենում է: Եթե այդ հնարավորությունը առկա չէ, նախատեսված է, որ գործատուն փոխհատուցում է այդ պարապուրդի համար, վճարում է միջին ժամային աշխատավարձի երկու երրորդի չափով, սակայն ոչ ավել, քան օրենսդրությամբ սահմանված նվազագույն չափը:
Սա տեղի է ունենում այն ժամանակ, երբ ոչ աշխատողի պատճառով աշխատավայրում առկա է պարապուրդ:
Միևնույն ժամանակ նույն հոդվածի 6-րդ մասի համաձայն՝ ՀՀ օրենսդրությամբ սահմանված կարգով անհաղթահարելի ուժ համարվող պատճառներով առաջացած պարապուրդի համար չի վճարվում:
Արտակարգ դրությամբ պայմանավորված, երբ այլևս հնարավոր չէ աշխատավայրից իրականացնել աշխատանքը, և աշխատողը անցնում է հեռավար աշխատանքի, որից չի տուժում դրա արդյունավետությունը, վարձատրությունը պետք է պահպանվի ամբողջությամբ:
Արտակարգ դրության ժամանակահատվածում, երբ գործատուն փոխում է աշխատանքային ռեժիմը և անցնում հեռավար աշխատանքի, դա աշխատավայրի փոփոխություն չի համարվի և գործատուն չի ենթարկվի պատասխանատվության:
Այն դեպքերում, երբ աշխատողը ուշանում է աշխատանքից կամ չի ներկայանում աշխատանքի, գործատուն, բացակայությունը անհարգելի համարելով, չի կարող աշխատողին հեռացնել աշխատանքից:
Գործատուն օրենքով կարող է ազատել աշխատակցին երկարատև հիվանդության պատճառով, այդ թվում՝ կորոնավիրուսով վարակման, եթե նա 140 օրվա ընթացքում աշխատանքի չի եկել: Իսկ մինչ այդ, եթե աշխատողը տեղեկանք է ներկայացնում ժամանակավոր անաշխատունակության մասին, ապա գործատուն չի կարող սեփական նախաձեռնությամբ դադարեցնել պայմանագիրը:
Հաշվի առնելով այն փաստը, որ այս ընթացքում չեն գործում ուսումնական հաստատությունները՝ երեխաներ ունեցող աշխատողների ուշացումները գործատուն ևս պետք է հարգելի համարի՝ չկիրառելով կարգապահական տույժեր:
Եթե այլևս հնարավոր չէ աշխատանք իրականացնել ոչ աշխատավայրում, ոչ տանը՝ աշխատողը իրավունք ունի օգտվել իր ամենամյա արձակուրդից, եթե ունի նման ցանկություն:
Խոսելով օրավարձով աշխատողների մասին՝ Ժորա Սարգսյանը նշեց, որ նրանք ևս ունեն նույն իրավունքներն ու պարտականությունները, եթե ունեն աշխատանքային պայմանագիր:
Օրավարձը ընդամենը աշխտավարձի որոշման ձև է: Հետևաբար այն կարգավորումները, որոնք կլինեն համընդհանուր, կտարածվեն նաև օրավարձով աշխատողների վրա:
Առայժմ անհնար է ասել, թե գործազրկության ինչ ցուցանիշներ կգրանցվեն Հայաստանում կորոնավիրուսի տարածմամբ պայմանավորված ճգնաժամի հետևանքով:
Ժորա Սարգսյանը հավելեց, որ աշխատակիցների հնարավոր կրճատումները միանգամից չեն լինի, համապատասխանաբար տեղեկությունների վերլուծության համար ևս ժամանակ է հարկավոր:
«Կփորձենք իրավիճակն ուսումնասիրել հնարավորինս սեղմ ժամկետում, որ հասկանանք, թե աշխատանքի շուկայում ինչպիսի վերադասավորումներ կլինեն, և պետությունն ինչպես կկարողանա օժանդակել խոցելի խմբերին: Այդպիսի քաղաքացիներին կառաջարկվի մասնակցել բնակչության զբաղվածության ապահովման պետական ծրագրերին»,- եզրափակեց Ժորա Սարգսյանը։
Գեղեցիկ Ոսկանյան
