Հայաստանում կորոնավիրուսի վարակի ամենամեծ օջախը Երևանն է, իսկ վարակի աղբյուրներն ամենուր են՝ աշխատանքի վայրում, հասարակական տրանսպորտում, փողոցում, հանրային սննդի օբյեկտներում, բանկերում և այլուր․ այս մասին մայիսի 28-ի ճեպազրույցին հայտարարեց վարչապետ Նիկոլ Փաշինյանը:
Իրավիճակից ելքը, ըստ վարչապետի, հակամահաճարակային կանոնների պահպանումն է: «Առաջին հերթին դիմակի համատարած և ամենուրեք կրումը: Երկրորդ, ձեռքերի պարբերաբար ախտահանումը: Երրորդ, սոցիալական հեռավորության պահպանումը: Պետք է բացառել հատկապես առևտրային կետերում առևտուրը, եթե վաճառողն ու գնորդը դիմակ չեն կրում», – ասաց Փաշինյանը՝ կոչ անելով դադարեցնել դիմակների շուրջ կատարվող բոլոր շահարկումները:
Նա անթույլատրելի համարեց կորոնավիրուսի հետ կապված ապատեղեկատվության տարածումը՝ նշելով, որ իրավիճակն ավելի քան լուրջ է և գնալով ավելի է լրջանում: «Անթույլատրելի եմ համարում դիմակի թանկ լինելու մասին շահարկումները, քանի որ մենք որևէ մեկին չենք ստիպում դիմակ գնել, այլ ասել ենք, որ դիմակը կարող եք պատրաստել նաև տնային պայմաններում և կրել այն», – նկատեց վարչապետը:
Նրա խոսքով՝ մասնագետների վերլուծությունը ցույց է տալիս, որ նույնիսկ տնային պայմաններում պատրաստված դիմակի որակյալ կրումը կարող է զրոյի հասցնել վարակի տարածումը:
«Բազմաթիվ վարակակիրներ, իսկ նրանց թիվը հազարների է հասնում, չգիտեն, որ իրենք վարակակիր են: Որևէ մեկը չգիտի, քանի որ հիվանդացածների շուրջ 70% դեպքերն անցնում են ասիմպտոմ: Մարդը չգիտի, որ հիվանդ է, վարակակիր է, քանի որ ոչ մի ախտանիշ չունի, սակայն այդ ընթացքում կարող է վարակել տասնյակ և հարյուրավոր մարդկանց», – ասաց նա:
Վարչապետը անթույլատրելի համարեց իրավիճակի զարգացումն այն սցենարով, որ վերակենդանացման բաժանմունքներում ֆիզիկապես տեղ չլինի: «Հիշեք, որ այդ պակասող տեղը կարող է անհրաժեշտ լինել ձեր հարազատին, ձեր ընտանիքի անդամներին: Խնդրում եմ իրավիճակին նայել այսպես», – ասաց կառավարության ղեկավարը՝ կոչ անելով փոխել հանրային վարքագիծը:
Փաշինյանը տեղեկացրեց, որ կիրառվելու են վարչական տուգանքներ, իսկ վերջին օրերին գործադրել են անսպասելի ռեյդերի պրակտիկա:
«Այդ ընթացքում ոստիկանության ու տեսչական մարմինների մեծ թվով աշխատակիցներ մտնում են որևէ վարչական շրջան, ստուգումներ կատարում և խախտումների արձանագրման դեպքում փակվում են օբյեկտներ, որոշ ժամանակով դադարեցվում է նրանց գործունեությունը», – ասաց Փաշինյանը՝ հավելելով, որ կրկնակի խախտումներ հայտնաբերելու պարագայում սպասարկման ու սննդի օբյեկտները, խանութները կարող են փակվել ոչ թե 24 ժամով, այլ մի քանի օրով, նույնիսկ մեկ շաբաթով:
Ոստիկանության պետ Արման Սարգսյանը տեղեկացրեց, որ վերջին երկու օրերում նման ստուգայցեր կատարվել են Դավիթաշեն, Նորք Մարաշ և Նուբարաշեն վարչական շրջաններում:
«Այսօր ստուգայցեր են իրականացվել Կենտրոն վարչական շրջանում, որոնց ժամանակ եղել են կրկնակի ուսումնասիրություններ: Ընդհանուր առմամբ, այս ռեյդերի արդյունքներով Դավիթաշեն վարչական շրջանում վարչական պատասխանատվության է ենթարկվել 104 քաղաքացի, իսկ Նուբարաշեն և Նորք Մարաշ վարչական շրջաններում՝ 124 քաղաքացի: Տեսչական մարմինները կասեցրել են 62 տնտեսվարող սուբյեկտի գործունեություն», – ասաց ոստիկանապետը:
Նա նաև նկատեց, որ Հայաստանի միջմարզային ճանապարհներին տեղադրվել են համապատասխան թվով ուղեփակոցներ, անցակետեր, որոնք հնարավորություն են տալիս ոստիկանության աշխատակիցներին մշտադիտարկել տրանսպորտային միջոցները, որոնցով երթևեկում են քաղաքացիները և հանրային ուղևորափոխադրում իրականացնող տրանսպորտային միջոցները:
Ոստիկանապետը նշեց, որ քաղաքացիները բաց տարածքներում իրենց մոտ պետք է ունենան դիմակ, դրանք պետք է կրեն կանգառներում, տաքսու վարորդներն ուղևորի առկայության պարագայում անպայման պետք է կրեն դիմակ և բացառեն ուղևոր փոխադրելը կողքի նստատեղին: Տրանսպորտային միջոցներում ևս քաղաքացիները մեկից ավել ուղևորի առկայության պարագայում պետք է պարտադիր կրեն դիմակ:
«Վերջին օրերին շուրջ 2 հազար քաղաքացիների նկատմամբ կազմվել են վարչական իրավախախտումների վերաբերյալ արձանագրություններ: Այդ գործընթացը լինելու է շարունակական: Ընդ որում, ստուգայցերը կատարվելու են նաև այն տարածքներում, որտեղ արդեն իսկ իրականացվել են: Սա մշտական գործընթաց է», – ասաց Արմեն Սարգսյանը՝ նշելով, որ այս ամենի նպատակը հակահամաճարակային կանոնների պատշաճ կիրառման ապահովումն է:
Նա նաև հորդորեց քաղաքացիներին հանգստյան օրերին զերծ մնալ զանգվածային միջոցառումներ կազմակերպելուց: «Զերծ մնալ արշավներից և ուխտագնացություններից, որոնք հղի են համավարակի տարածման վտանգով», – հայտարարեց ոստիկանապետը։
