Հ.Կ. – Միլանյան դերբիին թիմերը մոտենում են տարբեր կարգավիճակներով: Եթե «Միլան»-ն առաջատարն է և արդեն ապացուցել է, որ պայքարելու է միմիայն չեմպիոնության համար, ապա «Ինտեր»-ը միայն վերջին տուրերում է սկսել ցուցադրել քիչ թե շատ կայուն խաղ և ինչ-որ չափով բարելավել ցուցանիշները: Իտալիայի առաջնության վերջին տուրում տարած հաղթանակների շնորհիվ թիմերը դերբիին մոտենում են բարձր տրամադրությամբ, իսկ Իտալիայի գավաթի խաղարկության հանդիպումներն ավելի ուշ անցկացնելու հանգամանքը հնարավորություն է տալիս ավելի նպատակային նախապատրաստվել դերբիին:
Ա.Գ. – Հերթական դերբին, անկասկած, անցնելու է համառ և անզիջում պայքարում: «Միլան»-ը «Յուվե»-ի հետ միասին գլխավորում է մրցաշարային աղյուսակը, իսկ «Ինտեր»-ը վերջին հաջող ելույթների շնորհիվ արդեն լավագույն հնգյակում է: Ուստի հենց այս հանդիպումը կարող է ցույց տալ, թե որքան լուրջ են «ներաձուրիների» հավակնությունները: Կարծում եմ՝ խաղադաշտում ծավալվելիք իրադարձությունները կլինեն նույնքան հետաքրքիր, որքան երկու թիմերի պայքարն է՝ հունվարյան տրանսֆերային շուկայում Կառլոս Տևեսին ձեռք բերելու համար:
Հ.Կ. – Ներկայիս «Միլան»-ի առավելությունը «Ինտեր»-ի նկատմամբ դրսևորվում է ոչ միայն մրցաշարային աղյուսակում միավորների տարբերությամբ։ Եթե Մոուրինյոյի օրոք «Ինտեր»-ը «Միլան»-ի համար դարձել էր գրեթե անհաղթահարելի, ապա նրա հեռանալուց հետո արդեն «Միլան»-ն է սկսել «տոն տալ» երկու այս թիմերի դիմակայություններում: «Միլան»-ը հաղթել է վերջին 3 դերբիներում, այդ թվում՝ 2011թ. ամռանը կայացած սուպերգավաթի խաղարկությունում, ուստի հոգեբանական առավելությունն անկասկած լինելու է «ռոսոներիի» կողմը:
Բացի այդ՝ Ալեգրիի «Միլան»-ը, որն արդեն երկրորդ տարին է, ինչ խաղում է գրեթե նույն կազմով և տակտիկական դասավորությամբ, շատ ավելի կայացած թիմ է, քան «Ինտեր»-ը, որը վերջին մեկ տարվա ընթացքում դերբիին մոտենում է արդեն երրորդ գլխավոր մարզչի առաջնորդությամբ: Այս ամենը պետք է որ իր ազդեցությունն ունենա նաև խաղադաշտում՝ ապրիորի ֆավորիտի կարգավիճակը վերապահելով «Միլան»-ին:
Ա.Գ. – «Միլան»-ը, իրոք, ֆավորիտ է, բայց չմոռանանք, որ հաշվետու մրցավեճին «Ինտեր»-ի ֆուտբոլիստները մոտենում են բավական լավ մարզավիճակում: 10-րդ տուրում «Յուվենթուս»-ին պարտվելուց հետո թիմը վերջին յոթ հանդիպումներում տարել է վեց հաղթանակ և կրել ընդամենը մեկ պարտություն: Հատկապես հաջող է գործել «Ինտեր»-ի պաշտպանությունը, որն այս ընթացքում միայն երկու անգամ է մրցակիցներին թույլ տվել գրավել սեփական դարպասը: Իսկ այն փաստը, որ վերջին դերբիներում «Ինտեր»-ը միայն պարտություններ է կրել, կստիպի թիմի ֆուտբոլիստներին է՛լ ավելի մոտիվացված մոտենալ հանդիպմանը:
Հ.Կ. – Բնականաբար, ինտերիստները պարզապես այրվում են վերջին պարտությունների դիմաց վրեժխնդիր լինելու ցանկությամբ, սակայն դժվար է հաստատապես պնդել, որ դա կօգնի թիմին: Բացի այդ՝ որքան էլ որ Ռիվերայի և Մացոլայի ժամանակների սուր հակամարտությունը մնացել է վաղ անցյալում, իսկ երկու թիմերի միջև տրանսֆերներն ու խաղացողների փոխանակումն էլ ոչ ոքի չեն զարմացնում, դժվար է պատկերացնել, որ «Միլան»-ի խաղացողները դերբիին կմոտենան նվազ մոտիվացված կամ կարհամարհեն մրցակցին:
«Միլան»-ն այս պահին խաղացողների ընտրությամբ հավասարը չունի Իտալիայում, իսկ հարձակման գիծը, նույնիսկ Կասսանոյի բացակայությամբ, լավագույններից է աշխարհում: Եթե սրան գումարենք անչափ մոբիլ և ստեղծագործող միջին գիծը և այս մրցաշրջանում որակական նոր մակարդակի բարձրացած Քևին Պրինս-Բոատենգի խանդավառ խաղը, ապա դժվար է պատկերացնել, թե ինչ կկարողանա այս ամենին հակադրել «Ինտեր»-ը, որը, չնայած վերջին խաղերում համեմատաբար քիչ գնդակներ է ընդունել, բայց, բացառությամբ «Պարմա»-ի հետ հանդիպման, աչքի չի ընկել կառուցողական բարձրորակ գործողություններով: Կասկածից վեր է, որ «Միլան»-ը խաղացողների անհատական վարպետությամբ գերազանցում է «Ինտեր»-ին, ինչն էլ կարող է վճռորոշ դառնալ այս թիմերի դիմակայությունում:
Ա.Գ. – Ամենայն հավանականությամբ, այս հանդիպման համար երկու մարզիչներն էլ կընտրեն 4-3-1-2 տակտիկական դասավորությունը, թեպետ «Միլան»-ի պարագայում այն կարող է փոխակերպվել նաև 4-3-3-ի: Երկու թիմերի կազմերում էլ ընդգծված հարձակողական ոճի եզրային ֆուտբոլիստների բացակայության պայմաններում չափազանց ակտիվ են եզրային պաշտպանները, որոնց միացումները շատ հաճախ կարող են վճռորոշ դեր խաղալ մրցակցի նկատմամբ թվային առավելություն ստանալու հարցում: Այս առումով «Ինտեր»-ը շատ ավելի շահավետ դիրքում է, քանի որ Մայկոնը և Նագատոմոն «Միլան»-ի իրենց ախոյանների համեմատ շատ ավելի սուր ֆուտբոլիստներ են։ Նրանք հասցնում են հստակորեն կատարել նաև իրենց պաշտպանական ֆունկցիաները:
Շատ բան կախված կլինի նաև երկու թիմերի միջին գծի խաղացողների՝ մի կողմից Բոատենգի, Վան Բոմելի և Նոչերինոյի, իսկ մյուս կողմից՝ Մոտայի, Զանետիի, Կամբիասոյի և Սնեյդերի (հոլանդացու մասնակցությունը խաղին դեռևս հարցականի տակ է) խաղից: «Ինտեր»-ի համար կարևոր է նաև, թե ինչպես իրեն կդրսևորի վերջին տուրում «տրեկվարտիստայի» դիրքում փայլուն խաղ անցկացրած Դիեգո Միլիտոն: Այս գործոնը Ռանիերիի գլխավոր հաղթաթղթերից կարող է լինել և բնականաբար, չի կարող չառաջացնել Ալեգրիի անհանգստությունը:
Հ.Կ. – 4-3-1-2-ը վերջին շրջանում ընդհանրապես գերակայող մարտավարություն է իտալական մի շարք թիմերի համար: Այն ոչ միայն ճկուն է, այլև հնարավորություն է տալիս խաղի ընթացքում փոփոխել տակտիկական դասավորությունը, ավելացնել կամ փորձել գցել տեմպը: Կարծում եմ՝ անժխտելի է, որ «Միլան»-ը հենց այս դասավորության լավագույն կիրառողներից է, մինչդեռ «Ինտեր»-ը (չնայած Մոուրինյոյի օրոք հաճախ խաղում էր հենց այդպիսի տակտիկական սխեմայով) ամբողջ մրցաշրջանի ընթացքում օպտիմալ տակտիկայի փնտրտուքների մեջ է:
Անկասկած, Ռանիերին կարողացավ որոշակիորեն շտկել իրավիճակը թիմում, սակայն կարծում եմ, որ ներկայիս «Ինտեր»-ը, որքան էլ արժանիորեն կարողանա դիմակայել «Միլան»-ին, ի վիճակի չի լինի հաղթանակ տանել այս խաղում, ուստի կանխատեսում եմ «Միլան»-ի հաղթանակը՝ 2։1 հաշվով:
Ա.Գ. – Չնայած «Ինտեր»-ի հիմնական կազմի մեծ թվով ֆուտբոլիստների մասնակցությունը դերբիին առայժմ հարցականի տակ է, կարծում եմ՝ «ներաձուրիները» կկարողանան արժանի դիմադրություն ցույց տալ իրենց ոխերիմ հարևաններին: Հանդիպումը, ըստ իս, կավարտվի 1:1 կամ 0:1 հաշվով՝ հօգուտ Կլաուդիո Ռանիերիի սաների:
