2021-ը Հայաստանի խորհրդարանի համար «կռիվների» տարի էր։ Ութերորդ գումարման Ազգային ժողովն աշխատանքներն սկսեց լարված մթնոլորտում։ Այս խորհրդարանը կրճատեց նաև ամանորյա ոչ աշխատանքային օրերը, ընդլայնեց սոցփաթեթը, քրեականացրեց հայհոյանքը, խոշորացրեց համայնքները, փոփոխեց ընտրական օրենսգիրքը և այլն։
Իհարկե, օրենսդրական այս նախաձեռնություններից և ոչ մեկը ինքը՝ Ազգային ժողովը, չի հեղինակել։ Նախկինի պես՝ Հայաստանում օրենսդրական նախաձեռնությունները մեծամասամբ գալիս են գործադիրից, ոչ թե օրենսդիրից, թեև դա չի խանգարում, որ Ազգային ժողովն ինքն իր համար պարգևավճարներ սահմանի, իսկ խորհրդարանի խոսնակը՝ իր համար ծառայողական թանկարժեք մեքենա գնի։
