Անվտանգության խորհրդի քարտուղար Արմեն Գրիգորյանը փետրվարի 24-ին ընդունել է Հարավային Կովկասում և Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարին, հայտնում են ԱԽ գրասենյակից։
Հանդիպմանը մտքեր են փոխանակել ԼՂ հիմնախնդրի կարգավորման հետ կապված հարցերի շուրջ։
«Քննարկվել է հայ-ադրբեջանական բանակցությունների շուրջ բրյուսելյան ձևաչափի շրջանակներում ձեռք բերված պայմանավորվածությունների իրականացման ընթացքը»,- ասված է հաղորդագրությունում։
Տոյվո Կլաարի այցը տարածաշրջանային է։
«Վերադառնում եմ տարածաշրջան՝ մի շարք խորհրդակցությունների, որոնք հաջորդելու են Մյունխենում առաջնորդների հանդիպումներին: Սկսում եմ Երևանից»,- Թվիթերի իր էջում գրել էր ԵՄ ներկայացուցիչը։
Back in the region for a series of consultations to follow up on leaders’ meetings in Munich, starting with Yerevan. Look forward to good meetings in the morning.
— Toivo Klaar (@ToivoKlaar) February 23, 2023
Փետրվարի 18-ին Մյունխենում անվտանգության համաժողովի շրջանակում տեղի էր ունեցել վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը՝ ԱՄՆ պետքարտուղար Էնթոնի Բլինքենի միջնորդությամբ:
