Վերականգնվել է Կարմիր խաչի միջազգային կոմիտեի կողմից Արցախից բուժառուների տեղափոխումը Հայաստանի բժշկական կենտրոններ, հայտնում է Արցախի առողջապահության նախարարությունը։
Գերատեսչությունից նշում են, որ այսօր՝ մայիսի 26-ին, 15 բուժառու՝ ուղեկցողների հետ միասին, Կարմիր խաչի ուղեկցությամբ տեղափոխվել են Հայաստան։
«12 բուժառուներ, ովքեր պետական պատվերի շրջանակներում ժամանակին ուղեգրվել էին ՀՀ բուժում ստանալու համար, ուղեկցողների հետ վերադարձել են Արցախ։ Դեռևս տասնյակ բուժառուներ սպասում են իրենց տեղափոխությանը Հայաստանի Հանրապետություն»,- ասված է հաղորդագրությունում։
Արցախի «Արևիկ» բուժմիավորումում 6 երեխա գտնվում է նորածնային և վերակենդանացման բաժանմունքում, իսկ «Հանրապետական բժշկական կենտրոն»-ում 6 բուժառու գտնվում է վերակենդանացման բաժանմունքում, որոնցից 3-ը ծայրահեղ ծանր վիճակում։
Նախարարությունը տեղեկացնում է նաև, որ Արցախում մասնակիորեն վերականգնվել են պլանային հետազոտությունները և միջամտությունները։
Ապրիլի 29-ից հետո ԿԽՄԿ–ի միջնորդությամբ բուժառուներ չէին տեղափոխել Հայաստան։ Խնդիրն առաջացել էր Ադրբեջանի կողմից Լաչինի միջանցքում անցակետ տեղադրելուց հետո։
