Իսմի Աղաև, OC Media
Ադրբեջանում լրագրողների նկատմամբ շարունակվող բռնաճնշումների ֆոնին ոստիկանությունը ձերբակալել է ընդդիմադիր AbzasMedia-ի հետ կապ ունեցող ադրբեջանցի լրագրողի:
Չորեքշաբթի ձերբակալվել է անկախ լրագրող Հաֆիզ Բաբալին, որն աշխատել է AbzasMedia-ի հետ:
Հարազատները պատմում են, որ ոստիկանները նրան բերման են ենթարկել Բաքվից հյուսիս-արևմուտք գտնվող Սումգայիթ քաղաքում գտնվող նրա բնակարանը խուզարկելուց հետո։ Բաբաևը մասամբ կույր է, ունի երեք երեխա։
Ավելի վաղ՝ նոյեմբերի 28-ին, Բաբալին հարցաքննվել էր որպես վկա AbzasMedia-ի մի քանի աշխատակիցների դեմ գործերով։ Abzas-ի չորս աշխատակիցներ՝ տնօրեն Ուլվի Հասանլին, գլխավոր խմբագիր Սևինջ Վագիֆգիզին, փոխտնօրեն Մահամմադ Կեկալովը և լրագրող Նարգիզ Աբսալամովան ձերբակալվել են Ադրբեջան մաքսանենգ արտարժույթ ներմուծելու մեղադրանքով:
Հարցաքննությունից հետո Բաբալին ասել է, որ իրեն հարցրել են AbzasMedia-ի կառավարման և ֆինանսների մասին:
«Ես օգտագործել եմ AbzasMedia-ն որպես հարթակ՝ իմ հետազոտական և հետաքննական պատմությունները հրապարակելու համար, և կարծում եմ, որ դա ինձ հաջողվել է,- լրագրողներին նա ասել էր նոյեմբերի վերջին։- Այս հետաքննությունն ամբողջությամբ լուսաբանում և բացահայտում է Ադրբեջանի հասարակության թերություններն ու կոռուպցիան»։
Այդ ժամանակ Բաբալին AbzasMedia-ի նկատմամբ իշխանությունների ճնշումը վերագրել էր նոյեմբերի սկզբին իր արած հետաքննության հետ ընկերությունների մասին, որոնք, ենթադրվում է, կապված են Ադրբեջանի Պետական անվտանգության ծառայության ղեկավար Ալի Նաղիևի հետ։ Ըստ հետաքննության՝ այդ ընկերությունները տիրացել էին Նախիջևանի նախկին ղեկավար Վասիֆ Թալիբովին պատկանող բանկին։
«Սա վերջին կաթիլն էր,- «Ազատություն» ռադիոկայանին ասել էր Բաբալին:- Այս պահին նրանք որոշել են, որ սրան պետք է վերջ դնել»:
AbzasMedia-ում ձերբակալություններից հետո ձերբակալվեցին նաև մի քանի այլ անձինք, որոնք կապված են Ադրբեջանում անկախ լրատվամիջոցների հետ:
Դրանց թվում են իրավապաշտպան և նախկին ոստիկան Իլհամիզ Գուլիևը, որը AbzasMedia-ին անանուն մեկնաբանություններ է տվել կասկածյալների վրա թմրանյութեր տեղադրելու ենթադրյալ պրակտիկայի վերաբերյալ: Գուլիևը ձերբակալվել է և մեղադրվում է մեծ քանակությամբ մետամֆետամին պահելու մեջ։
Ձերբակալվել են նաև Kanal 13 և Kanal 11 առցանց հեռուստաալիքների հիմնադիրները։ Առաջինին մեղադրանք է առաջադրվել առանց թույլտվության տուն կառուցելու, իսկ երկրորդին՝ շորթման համար։
