Վարչապետ Նիկոլ Փաշինյանը հայտարարել է, որ Հայաստանը ճանաչում է Ուկրաինայի տարածքային ամբողջականությունը՝ Ալմաթիի հռչակագրի հիման վրա։
«Մենք Ալմաթիի հռչակագիրն ընդունում ենք, բայց Ալմաթիի հռչակագիրը միայն մեզ համար չէ։ Ալմաթիի հռչակագիրն ընդունել են Խորհրդային Միության 13 հանրապետություններ, այդ թվում՝ Ռուսաստանը և Ուկրաինան։ Ուկրաինայի հարցում մեր ընկալումն այդ է, որ Ալմաթիի հռչակագիրն է հիմքը մեր անկախությունները ճանաչելու, տարածքային ամբողջականությունները ճանաչելու։ Նույնը մեր տրամաբանությամբ պետք է գործի Ուկրաինայի դեպքում, որովհետև այդ թուղթը վերաբերում է բոլորիս, և եթե դա քանդում ենք, ուրեմն կարող է քանդվել ամեն ինչ»,- փետրվարի 18-ին Մյունխենի հայ համայնքի հետ հանդիպմանը հայտարարել է վարչապետը։
Փաշինյանը հիշեցրել է նաև նախկինում իր հնչեցրած մտքերից մեկը, որ Ուկրաինայի հարցում Հայաստանը Ռուսաստանի դաշնակիցը չէ։
***
1991 թվականի դեկտեմբերի 21-ին Ղազախստանի մայրաքաղաքում ստորագրվեց Ալմաթիի հռչակագիրը։ ԱՊՀ ստեղծման մասին Ալմաթիի հռչակագրում ասվում է, որ նոր պետությունների միջև սահմանները հիմնվելու են ԽՍՀՄ հանրապետությունների վարչական սահմանների վրա։
