Անի Գրիգորյան, #CivilNetCheck
Ռուսաստանի արտաքին գործերի նախարար Սերգեյ Լավրովը մարտի 28-ին «Իզվեստիա» թերթին տված հարցազրույցում պնդել է, թե Հայաստանում ԵՄ դիտորդական առաքելության կազմում ընդգրկվում են զինծառայողներ ոչ ԵՄ անդամ երկրներից՝ Կանադայից, Նորվեգիայից և ԱՄՆ-ից։
«[…]Այժմ այնտեղ [Հայաստան` խմբ.] զինծառայողներ են ուղարկվում Կանադայից, Նորվեգիայից և ԱՄՆ-ից՝ այն [ԵՄ առաքելությունը՝ խմբ.] վերածելով Հյուսիսատլանտյան դաշինքի առաքելության»,- ասել է Լավրովը։
Մինչդեռ, ՌԴ արտգործնախարարը մոլորեցնում է։ Ոչ ԱՄՆ-ից, ոչ Նորվեգիայից, ոչ էլ Կանադայից զինծառայողներ չեն ընդգրկվել ԵՄ առաքելության մեջ։
Այսպես, դեռ 2023-ի հոկտեմբերին հայտնի դարձավ Կանադայից ԵՄ առաքելության կազմում երկու փորձագետ ընդգրկելու մասին։
Այդ մասին հայտնել էր Հայաստանի փոխարտգործնախարար Պարույր Հովհաննիսյանը՝ Կանադայի արտաքին գործերի նախարար Մելանի Ջոլիի հայաստանյան այցի ժամանակ։
ԵՄ առաքելությունից #CivilNetCheck-ի հարցմանն ի պատասխան՝ մարտի 29-ին հայտնեցին, որ կանադացի առաջին փորձագետը կմիանա առաքելությանը ապրիլի կեսերին։
Ինչ վերաբերում է ԱՄՆ-ին, ապա առաքելությունից հավաստիացնում են, որ չի նախատեսվում ԱՄՆ մասնակցություն դիտորդական առաքելությանը։
Իսկ Նորվեգիայի մասով ԵՄ առաքելությունից հայտնում են, որ Բրյուսելում ԵՄ գրասենյակը վերջնականացնում է Նորվեգիայի հետ համաձայնագիրը. «Նրանք մոտ ապագայում կմասնակցեն ԵՄ առաքելությանը»։
Հարցազրույցի ընթացքում հնչեցված այլ պնդումներին ՍիվիլՆեթի փաստերի ստուգման թիմը կանդրադառնա ավելի ուշ։
