Հայաստանի քաղաքացիական հասարակության մի խումբ առաջատար կազմակերպություններ հայտարարություն են տարածել՝ իրենց համերաշխությունը հայտնելով վրացի գործընկերներին այն բանից հետո, երբ Վրաստանի իշխանությունները կրկին օրակարգ բերեցին քաղաքացիական հասարակության կազմակերպություններին և լրատվամիջոցներին թիրախավորող խնդրահարույց օրենքների նախագծեր։
Ուրբաթ Հայաստանի քաղաքացիական հասարակության ավելի քան 20 կազմակերպություն և անհատ հայտարարություն են տարածել, որում պնդում են, որ «օտարերկրյա ազդեցություն» հասկացությունը ասոցացվում է «դավադրության տեսությունների առաջխաղացման հետ, ինչն օգտագործվում է մարդու իրավունքների ոտնահարումների և անմեղ մարդկանց հետապնդելու համար» թե՛ Հայաստանում, թե՛ Վրաստանում։
«Մենք աջակցում ենք ձեզ, որ քաջություն եք դրսևորել և դեմ եք դուրս գալիս Վրաստանի կառավարության հետևողական և մշտական ջանքերին, որոնք նպատակ ունեն սահմանափակել քաղաքացիական ազատությունները և մարդու հիմնարար իրավունքները, այդ թվում՝ կանանց քաղաքական մասնակցությունը սահմանափակելու տեսքով, ինչպես նաև կրկին օրակարգ բերել օտարերկրյա քաղաքացիների թափանցիկության մասին օրենքի նախագիծը»,- ասվում է հայտարարությունում։
Տե՛ս՝ Վրաստանի կառավարությունը հետ է բերում օտարերկրյա գործակալների մասին չեղարկված օրենքը
Հայտարարության հեղինակները նաև նշել են, որ կարևոր է միավորել «ժողովրդավարական ուժերին» և դիմակայել տարածաշրջանում ժողովրդավարությունը թուլացնելու փորձերին։
«Մենք գիտենք, որ ազատությունը խորապես և ի սկզբանե արմատավորված է մեր հասարակություններում, և նույնիսկ պատմության ամենախավար պահերին դրա համար մղվող պայքարը երբեք չի թուլացել»,- ասվում է հայտարարությունում։
Հայտարարությունն ստորագրողներից Հանրային լրագրության ակումբի նախագահ Սեդա Մուրադյանը OC Media-ին ասել է, որ նման զարգացումները վտանգավոր են և սպառնում են տարածաշրջանում ժողովրդավարությանը, որը խոցելի է երկու երկրներում:
«Կարծում եմ, որ այս իրավիճակում կարևոր էր Վրաստանի քաղաքացիական հասարակությանը համերաշխություն հայտնելը, որպեսզի նրանք իրենց միայնակ չզգան տարածաշրջանում,- ասել է Մուրադյանը։- Դժվար թե նրանք աջակցություն ստանան հարևան այլ երկրներից, քանի որ հայտնի է, որ տարածաշրջանի մյուս երկրներում իրավիճակը ավելի ողբալի է այդ առումով»։
«Մեր քաղաքացիական հասարակությունների միջև երկար տարիներ շատ ամուր կապեր են եղել»,- ասել է Իզաբելլա Սարգսյանը, որն աշխատում է քաղաքացիական հասարակության հարցերով զբաղվող Եվրասիա համագործակցություն հիմնադրամում, սակայն հայտարարությանը որպես անհատ է միացել։ Նա OC Media-ին ասել է, որ երբ 2020-ին սկսվեց Ղարաբաղյան երկրորդ պատերազմը, մի խումբ վրացիներ և աբխազներ հանդես եկան համատեղ հայտարարությամբ, որ պատերազմը պետք է դադարեցվի։
Սարգսյանը հավելել է, որ 2008-ին Երևանում նախագահական ընտրություններից հետո տեղի ունեցած բողոքի ցույցերի ժամանակ ինքն ստացել է վրացի գործընկերների անմիջական աջակցությունը։
«Երբ նստացույց էր, վրացի գործընկերներս և ընկերներս մեզ ծաղիկներ ուղարկեցին՝ մեր վրանում դնելու համար։ Նրանք միշտ հետևում և աջակցում էին մեզ»,- ասել է նա։
Արշալույս Բարսեղյան, OC Media
Տե՛ս նաև՝
Oտարերկրյա գործակալների մասին Վրաստանի օրինագիծը «լուրջ մտահոգություններ է առաջացնում» ԵՄ-ում
Վրաստանի խորհրդարանն ընդունել է գենդերային քվոտաների վերացման փոփոխությունները